Footer

Balay, naserrek bayat kaawan dagiti bumalay

SALCEDO, Ilocos Sur – Diyo panawan dagiti napateg a sanikuayo no pumanawkayo ta dinto ket kurimesen dagiti mannanakaw.

Leksion daytoy iti agassawa a Mario Corpuz y Taqueban ken ti asawana a ni Kenneth Joy ta natakawanda idi pinanawan ti babai ti bagna a naglaon iti laptop, kuentas ken singsing iti  iti rabaw ti lamisaan iti kusina ti balayda sadiay Sitio Mugao, Barangay Lucbubanm, Salcedo idi napanda nakipamunpon.

Idi nakasangpetda iti balayda, naduktalan laengen dagiti agassawa a naluktan ti bag ken awanen dagiti nadakamat a sanikuada.

Maysa a saksi ti nagkuna a nakitana ti suspek a nabigbig idi agangay a maysa nga Albert Garcia y Mangay-ayam, 21, awanan asawa, laborer, ken residente iti Barangay San Gaspar, Salcedo, Ilocos Sur, a rimmuar iti balay dagiti biktima.

Naaresto ti suspek iti maysa a farm house sadiay Sitio Arnap, Barangay Balidbid, Salcedo kalpasan a  narekobre iti ikutna ti mapukpukaw a lap top.

Iti pannakaisurat daytoy, nakakustodia ti suspek iti police station ditoy.#

 
Comments are closed.