Footer

BANNER NEWS: Search operations ti kapolisan, nagpositibo kadagiti paltog, droga, balbala

STA. CATALINA, Ilocos Sur – Malaksid kadagiti paltog, droga, drug paraphernalia ken balbala ti nakumpiska dagiti polis iti inwayatda a nagsina a search operation iti pagtaengan ti maysa a mangngalap sadiay Barangay Poblacion ken Barangay Subec ditoy nga ili idi agsapa ti Marso 9.

Ad-adda pay a dimmagsen ti kaso maikontra ken ni Antonio Ramolete y Rallojay, 37, naasawaan, residente iti Barangay Poblacion, agsipud ta dua kadagiti paltog a nakumpiska dagiti operatiba ti nagpason ti lisensiada idinto a  homemade ti maysa pay a paltog.

Iti operasion nga inwayat dagiti nagtitipon  nga elemento ti  CIDG Ilocos Sur, Sta. Catalina Police Station, Maritime Group, ISPPSC, PIB ken PDEA iti balay ni  Ramolete iti Barangay Poblacion, nakakumpiskada  iti maysa a cal. 54, Amscor Buddy nga addaan serial number B97180; maysa a gauge 12 shotgun nga addaan serial number 4558845, Karatay Magnum; 4 a magazine assembly para iti cal. 45; 7 a bala ti cal. 45; 2 bala para 12 gauge 12 shotgun; ken assorted drug paraphernalia.

Iti operasion sadiay Barangay Subec, nakakumpiska dagiti operatiba iti maysa a homemade/converted cal. .22 rifle; 2 spent shells ti .22 rifle; maysa a plastic sachet a nagkarga iti mapapati a shabu ken  assorted drug paraphernalia.

Ngem segun iti polis, nagpason idi pay la Mayo 2015 ti cal. 45 pistol ken  ti shotgun 12 GA a namarkaan Akkar (Karatay).

Iti pannakaisurat daytoy, maisagsaganan ti kaso a panagsalungasing iti RA 9165 ken RA 10591 maikontra ken ni Ramolete.

Kabayatanna, nagpositibo ti panagsukisok nga inwayat ti kapolisan ti Narvacan iti pagtaengan ti maysa a Reygie Cantoria y Dalipog, 34, naasawaan, mekaniko, ken residente iti Barangay Sulvec, Narvacan itay nabiit.

Nakakumpiska dagiti polis iti maysa a cal. super 38 Tanfoglio nga addaan serial number V02974; maysa a Valto Model 85 combat cal. 9mm; maysa a paltog a saan nga ammo ti kalibrena nga addaan marka a Libera Vendita nga addaan magazine; dua a magazine para cal. super 38, 10 a bala para cal. super 38, 5 spent shells para cal. super 38; 3 bala para cal. 9mm; maysa a bala para 12 gauge shotgun; maysa a bala para cal. 32; maysa a bala para cal. 22; ken maysa a holster.

Impakat dagiti polis ti panagsukisok babaen ti bileg ti search warrant nga inyisio ni Judge Gina Juan Chan ti Regional Trial Court Branch 22, Narvacan. (Tawid News Team)

 

 
Comments are closed.