Footer

Construction worker, nalmes iti quarry site

BANTAY, Ilocos Sur – Bangkayen idi masarakan dagiti immarayat a kameng ti MDRRMC ken ti PDRRMC ti maysa a construction worker a naipadamag a nagpukaw bayat ti panagdidigosda nga agkakadua iti quarry site sadiay San Mariano ditoy nga ili idi malem ti Marso 1.

Awanen ti biag ni Melchor Rubianes y Silvania, 30, naasawaan, residente iti Barangay Turod, Cabugao, Ilocos Sur ngem agnanaed iti balay ti katuganganna sadiay Sitio Portugues, Barangay Tay-ac, Bantay idi maidanon iti Metro Vigan Cooperative Hospital.

Segun iti report, agpidpidut da Rubianes ken dagiti di nainaganan a kakaduana iti bato a masapulda iti konstruksion iti nasao a quarry site ket kalpasan ti pangngaldawda idi agarup 12:30 ti malem, napanda nagdidigos iti karayan.

Kinuna dagiti kakadua ni Rubianes a bayat ti panagdidigosda, nakitada laengen ti biktima nga malmalmes ngem idi mapanda arayaten, kellaat a limned daytoy.

Kalpasan ti tallo nga oras a panagsapul dagiti immarayat a kameng ti MDRRMC, PDRRMC ken dadduma a nagbulontario, nasarakanda a bangkayen ni Rubianes idi agarup 3:40 ti malem iti dayta met laeng a petsa.#

Comments are closed.