Footer

EDITORIAL: Implementasion ti Operation Double Barrel 2

NAGSUBLI manen dagiti kameng ti Philippine National Police nga aktibo iti gerra ti gobierno maikontra iti panagraira ti illegal a droga iti Pilipinas.

Minandar ni Presidente Rodrigo Duterte ni PNP Chief Director General Ronald “Bato” dela Rosa ti pannakaiwayat ti Operation Tokhang ken Operation Double Barrel kalpasan ti makabulan a pinasardengna dagiti polis kas lead agency iti kampania kontra illegal a droga kabayatan ti kontrobersia ti pannakakidnap ken pannakapapatay ti Koreano a negosiante a ni Jee Ick Joo sadiay mismo uneg ti Camp Crame a PNP National Headquarters babaen kadagiti kameng ti nawaran a PNP Anti-Illegal Drugs Group.

Maipalagip a gapu iti alegasion ti “Tokhang for Ransom,” nangisayangkat ti Senate Committee on Public Order and Illegal Drugs nga indauluan ni Senador Panfilo Lacson iti imbestigasion a nakapaayaban dagiti maseknan a polis kangrunaanna da Supt. Rafael Dumlao II ken SPO3 Ricky Sta. Isabel ken dadduma pay a personalidad. Iti Senate investigation, natakuatan dagiti panagabusar dagiti polis iti pannakaisayangkat ti Operation Tokhang kas ti panagmula ti ebidensia, panagkidnap ken panangkikilda kadagiti agbalin a biktimada.

Narurod idi ni Duterte kadagiti polis a nainaig kadagiti illegal nga aktibidad. Inrakurakna nga agarup 40% kadakuada dagiti “corrupt.” Inmandarna ti “internal cleansing” wenno pannakadalus ti PNP, ken pannakaidestino dagiti nasurok a 300 a police scalawags sadiay Basilan kas disciplinary action tapno mareporma dagitoy a polis, ngem nasurok laeng a 50 dagiti nagtungpal idi bilin, ken rimsua ti alegasion nga adda nagpasuksok iti P500,000 tapno saan a maidestino sadiay Basilan.

Kabayatan ti makabulan a napasardeng dagiti polis kadagiti anti-illegal drugs operations, naipaima daytoy iti Philippine Drug Enforcement Agency. Bayat dagiti operasion nga insayangkat ti PDEA, nagbalin laeng dagiti polis a back-up and perimeter personnel. Iti las-ud ti nasurok a makabulan, napaliiw a saan unay a nadara wenno bassit dagiti napapatay nga adda pakainaiganna iti illegal a droga.

Iti panagsubli dagiti polis kas aktibo a paset ti kampania kontra illegal a droga ket agtalinaed ti PDEA kas lead agency. Agparparang a saan a kabaelan ti PDEA a paksiaten ti illegal a droga gapu ti kinakurang dagiti taoda ken panagsaknapen ti problema uray kadagiti nasulinek a barangay.

Nabukelen ti baro a PNP Unit nga idauluan ni Sr. Supt. Graciano Mijares kas lider iti kampania kontra illegal a droga. Daytoy nga unit ket direkta nga adda iti babaen ti PNP Chief. Naimandar metten ti nasayaat a pannakapili dagiti adaan iti awan-mulitna ti integridadna nga agkameng para ti anti-illegal drugs operations kadagiti rehion, probinsia, siudad ken ili. Naibilin pay ti regular a pannakarepaso ti gapuanan dagiti naikappeng a polis kadagiti anti-illegal drugs operations.

Impakaammon ni Dela Rosa iti publiko dagiti baro a pagallagadan iti pannakaisayangkat ti Operation Double Barrel a kangrunaan a target ket dagiti big-time drug personalities.   Inawisna pay dagiti papadi ken lider ti religious sector ti pannakikaysada kadagiti anti-illegal drugs operations tapno mapatalgedan ti nasayaat a pannakayimplementarna.

Ngem addan dagiti Obispo a nagkedked iti imbitasion ta pagarupenda a maaramat laeng dagiti papadi a paglandekan ti pammabalaw no agkibaltang dagiti operasion.  Agtultuloy met ti tarigagayda nga iti pannakaiwayat dagiti anti-illegal drugs operations ket masalakniban koma ti kinasagrado ti biag, ken maraem ti kalintegan dagiti tattao, ken maaddaan ti gundaway dagiti suspek a mangdepender ti bagida iti korte, ken maikkanda ti panawen nga agbabawi ken agbalbaliw.

Nadagsen a talaga ti problema ti panagraira ti illegal a droga ta inkari idi ni Duterte idi pay panawen ti kampania a paksiatenna iti las-ud ti tallo aginggana iti innem a bulan, ngem siam a bulanen isuna ket daytoy pay laeng ti sentro ti atension ti administrasion iti kadagupan dagiti agrurutap a problema ti Pilipinas iti benneg ti kappia ken talna, ekonomia ken seguridad ti pagilian.

Napateg ti aktibo a pannakipaset ti PNP iti pannakapaksiat ti illegal a droga ta isuda ti napusgan a mangipakat ti linteg. Ngem nadalusan kadin ti PNP iti las-ud ti makabulan tapno agsublida iti nadagsen nga akem? Umanay ngatan ti makabulan nga internal cleansing ti PNP a kuna ti Commander-In-Chief a 40% kadakuada ti corrupt? Iti kampania kontra illegal a droga ket saan laeng a responsibilidad ti gobierno ngem amin a sektor iti pagilian. Agballigi laeng daytoy no adda panagtalek ken panagkaykaysa dagiti kaaduan nga umili.  (Eden Alviar)

Comments are closed.