Footer

EDITORIAL: Rigodon iti Senado

MAMINSAN pay a napaneknekan iti Pilipinas nga iti manera ti politika ket awan ti permanente a kadua ken kabusor, ngem ketdi, permanente nga interes dagiti politiko.

Naklaat dagiti Pilipino iti kellaat a panagbaliw ti pakabuklan ti Majority iti Senado ta kellaat laengen ti pannakapadisi kas President-Pro Tempore ni Senador Franklin Drilon, ken panangsukat kenkuana ni sigud a Minority Leader Ralph Recto. Nasukatan met da Sen. Francisco Pangilinan kas Chairman ti Committee on Agriculture babaen ken ni Sen. Cynthia Villar; Sen. Paulo Aquino kas Chairman ti Committee on Education babaen ken Sen. Chiz Escudero, ken Sen. Risa Hontiveros kas Chairperson ti Committee on Health.

Napasamak ti kellaat a reshuffle iti Senado kalpasan kadagiti nagsasaruno a pasamak a nakainagan ni Drilon ken dagiti kakaduana gapu ti pannakikaysada kadagiti gannuat a maikontra iti interes ti administrasion – ti ikakanunongda ti pannakapalubos ni SPO3 Arturo Lascañas nga agtestigo manen iti Senado mainaig iti kinapudno ti Davao Death Squad; ti pannakisimpatiada ken ni Sen. Leila De Lima kabayatan ti pannakaarestona ken pannakaibaludna gapu iti maatap a pannakainaigna iti illegal drug trade; ti pannakikaysada iti pannakarambak ti maika-31 nga anibersario ti EDSA People Power Revolution; ken ti posisionda iti pannakaisubli ti Dusa a Patay.

Ni Pangilinan ti agdama a Presidente ti Liberal Party, Bise Presidente iti LP ni Drilon, ken kameng met ni Aquino. Ni Hontiveros ket kameng ti Anakbayan Partylist a kaaliado ti LP iti napalabas nga eleksion. Dagitoy ket sigud a kameng ti Super Majority a simmuporta iti panangabak ni Senate President Aquilino “Koko” Pimentel III. Agpada met da Recto ken Escudero a sigud a minority.

Rinasonan ni Pimentel a ti reshuffle iti Senado ket nasken tapno saan a makatubeng iti naannayas ti proseso dagiti gakat para ti pagimbagan ti kaaduan. Impalgak met ni Sen. Manny Pacquiao, ti nangimosion iti Senado iti rigodon a kasla panangliput dagiti sigud a kakaduada dagiti mapaspasamak isu a nasken a makasinunuoda no sino dagiti kaaliado ken kabusorda.

Kasla saan a mamati ti liderato iti Senado idi naabak iti panagbobotos dagiti senador ti pannakaituloy ti imbestigasion ken ni SPO3 Lascañas ta saanda koman a kayat nga agtestigon isuna tapno baliktadenna ti immuna a testimoniana a saan a pudno ti DDS ken iyimplikarnan ni Presidente Rodrigo Duterte nga adda iti likudan ti vigilante group idi mayor pay laeng sadiay Davao City.

Kinontra dagiti napadisi a kameng ti LP ken Anakbayan a sigud nga adda iti Super Majority dagiti alegasion kadakuada ta simmuportada kadagiti gannuat para ti sapasap a pagimbagan dagiti Pilipino. Inlawlawagda met a ti posisionda a nasken ti panagtestimonia manen ni Lascañas iti Senado tapno maammuan ti publiko ti kinapudno.

Iti agdama, nagbalinen a kameng ti Minority da Drilon, Pangilinan, Aquino ken De Lima. Temporario met nga agakem a Minority Leader ni Sen. Antonio Trillanes IV kasukat ni Recto.

Adda dagiti mamati a napadisi da Drilon ken dagiti kakaduana gapu ti impluensia ti Malacañang, kas ti napasamak ken ni Vice President Leni Robredo idi napadisi kas kameng ti Gabinete ni Presidente Duterte gapu kadagiti pagtaktakderan ken pammatina a naigidiat iti administrasion.

No napadisi ni Drilon ken dagiti kakaduana gapu iti panangaramidda kadagiti rebbenganda kas karit iti Senado a maibilbilang nga adigi ti demokrasia. Maibilang ti Lehislatura nga independiente a sanga ti gobierno, a kapada ti Ehekutibo, ken Hudikatura. Kadagiti naglabas nga administrasion, uray no nagkaaliado ti administrasion ken liderato ti Senado ket nagbalin a nawaya dagiti kaaduan a senador.

Ibagbaga ni Recto nga uray isunan ti Senate Pro Tempore ken kamengen ti Majority ket agtultuloy ti kina-idealismona ken panangsurotna ti konsensiana a mangilungalong kadagiti gannuat para iti pagsayaatan ti kaaduan ken mangkontra kadagiti patienna a makadakes iti interes ti sapasap. Impalgakna nga itultuloyna ti takderna maikontra iti gakat a pannakaisubli ti Dusa a Patay nga idurduron ita ti Majority idiay Kongreso. Maipalagip a ni Recto ket nagkandidato kas kameng ti LP ngem pinilina ti nagyan idi iti Minority.

Paliiwen no kasano ti annayas ken pagturongan ti imbestigasion ken ni SPO3 Lascañas sadiay Senado. Obserbaren no kasanonto ti pannakatratar ti gakat a pannakaisubli ti Dusa a Patay sadiay Senado no pumasa dayta a linteg wenno saan ta adu met dagiti senador a naikappeng iti Majority dagiti magibagbaga a pro-life-da ken kontraenda ti Death Penalty.

Rumbeng laeng a nawaya ti Senado iti pressure ti sino man nga opisial tapno maakem ti Institusion ti kangrunaan nga annongenna kas kamang ken sarikedked ti demokrasia. Ngem iti realidad, adu kadagiti senador dagiti sumursurot lattan ti agus ti turay tapno masaluadan ti bukodda nga interes. (Eden A. Alviar)

 
Comments are closed.