Footer

SINURSURAN: Narigat ti Agsakit

Kolum ni Jobert M. Pacnis

(UMUNA A PASET)

 

NALUKAG iti pannakatugtog ti ridaw ti salasda kadayta a parbangon. Naitimkanna ti amana.

Naarakattot a nangilukat iti ridaw. Saan nga umal-allatiw ti amana a parparbangon nga adda laeng iti abagatan ti balayda kaduana ni nanangda. Kabbalayda ti kabsatna ken dagiti kakaanakanna.

“Alaem man ‘ta motormo ta kaduaennak a mapan idiay ospital,” kinuna ti amana. “Nagibleng metten ni nanangmo ket adda nabiag a dara a kasurotna. Agkapsut payen.”

Nalukag met ti asawana. Binilinna a makaammo pay laeng kadagiti tallo nga ubbingda yantangay adda met ti ikitda a maymaysan nga agbibiag a kabbalayda. Dagus a nagsukat ken innalana ti motorna. Sarunuenna ti amana a mangmaneho iti kulongkulong daytoy a pangitultulodna no kua ken ni nanangda a mapan aglako iti natnateng idiay ili.

Kinadua ti kaanakanna a balasitang ti nanangda a nagtugaw iti kalungkalong. Sinarsarunona dagitoy iti panagbiaheda nga agturong iti district ospital ti ilida nga agarup lima kilometro ti kaadayona iti barioda.

Gapu ta lakayen ti amada, napainayaden daytoy nga agpataray. Nalaka a matuleng iti naraniag a silaw. Isu koma ti mangmaneho iti kulongkulong ngem saan a kabisado ti amada ti agmotor iti awan clutch-na. Isu nga agarup duapulo minutoda sakbay a nagtengda ti ospital kadayta nga agalas tres ti parbangon.

Iti ospital, kalpasan a naalaan ti nars iti impormasion ti inana, rimmuar ti doktor ket isu met ti nagsaludsod. Pagammuan, kuna daytoy nga itarayda lattan ti inana iti ospital iti kabangibang a probinsia (a kurang a maysa nga oras ti biahe no multikab ti  lugan). Ta ad-adayo nga amang no iti pay district hospital iti ili ti Aparri wenno iti mismo a siudad ti Tuguegarao iti probinsiada. Maymayaten iti imbagada nga ospital ta as-asideg.

Baka kano ngamin no kasapulan a mayalisonan iti dara ti inana ket awanto met laeng ti maited ti district hospital.

Ammona a dakkel ti magastos iti nairekomenda nga ospital kadakuada. Pribado ngamin daytoy. Ngem ania ngarud no isu ti kaasitgan ken kumpleto iti alikamen! Sa maysa, inana ti pasiente!

Dagus a naasikaso ti papel ni nanangna. Nupay nakapsuten daytoy, awan man laeng ti uray ania a naipakat nga agas uray koma laeng no suero naimbag laeng a pangpasubli iti pigsa daytoy. Ngem saandan a nagsasao pay ta ti doktor ti ad-adda a makaammo iti situasion.

Nailugan ti inana iti ambulansia. Nagbayadda nga immuna iti para krudo a tallo gasut a pisos. Kapilitan nga ibatida dagiti luganda a nangitaray ken ni nanangna. Awan pay ti duapulo minuto, addadan iti nairekomenda nga ospital kadakuada.

Inalaanda a dagus iti impormasion ti inana. Pinakatanda iti nadumaduma nga eksamen. Na-ultrasound ken ECG. Kalpasanna, pinakatanda a dagus iti suero.

Kinuna pay ti doktor nga apaman nga agibleng manen ti inana, mangipanda iti plastic cup a maala iti ‘yan ti estasion dagiti nars a naka-duty. Masapul a ma-fecal test daytoy tapno ad-adda a maitutop dagiti maikapet nga agas kenkuana.

Agalas singkon iti agsapa. Inyiladna kadagiti monoblock a naintar iti sango ti ospital. Nabati ti kaanakan ken ni tatangna iti uneg a nangbantay ken ni nanangna. Kapilitan nga aglangan iti pagadalanda.

Ngem nasakit ti bukotna a maidekket iti monoblock a napagaabay.

Namrayanna ti nagpagnapagna. Pinampanunotna ti magastosda. Aglalo ket ammona nga awan urnong da tatang ken nanangna ta mapan amin kadagiti kakaanakanna nga annak ti kakaisuna a kabsatna a babai a kabbalay dagitoy.

Kasano, buong ti ulo ti kayongna. Mammartek ken nakaad-adun ti riribuk a nakaipasungalngalanna iti barangay. Bastos pay ken saannan nga ammo ti pamiliana. Ngem napuskol latta ti rupana. Agawid no kaykayatna; nabartek nga awan man laeng ti isangpetna a para pamiliana.

Damo ti inada ti mayospital a kastoy. No agpadoktor man, puro out patient. Addan pamalpalatpatannan no ania ti napasamak. Ulser, dayta ti atapna. Kasano, nasapa a mapmapan idiay plasa ti inana tapno aglako iti nateng. Kadawyan a malabes ti bisinna. Iti panaglakolakona ti namataudanda iti panagbasana. Dayta ti dina malipatan.

Uray kasano ti rigat da tatang ken nanangna, insakad dagitoy ti panagbasada nga agkabsat. Pagdaksanna, nasapa a nakiasawa ti adienna.

(Adda tuloyna)

 
Comments are closed.