Footer

3 balay, nagsasaruno a natakawan iti Candon City

CANDON CITY – Dua a balay sadiay Barangay Patpata 1st, idinto a sabali pay a balay sadiay Barangay Calaoa-an, barangay amin daytoy a siudad, ti nagsasaruno a natakawan idi Marso 30.

Immuna a naireport a naserrek ti balay ken natakawan da Jovita Manzano Galdonez, 70, balo, ken ti apoba a kabbalayna a ni Clarise Galdonez Jimenez, 15, awanan asawa, estudiante a nakatakawan ti kuarta, laptop, tablet, selpon ken relo ti balasang.

Segun ken ni Clarise, nakariing gapu iti uni ti nailukat a drawer ket idi rimmuar iti kuartona ken nagturong iti salas, nakitana ti maysa a tao a nagaruat iti diaket nga addaan iti hood a magmagna nga agturong iti kusina, sa ti panagpukkaw ti lolana iti “HOY! HOY! HOY!.

Kinuna met ni Jovita nga idi agarup alas 4:00 ti parbangon ti nadakamat a petsa, rimmuar iti kusina ket napanna insagana dagiti labaanna iti pagbombaan iti danum idi nakitana ti maysa a lalaki a nagaruat iti diaket nga addaan hood iti ruar ti balay.

Pinukkawan ni Jovita ti lalaki ngem dagus a timmaray daytoy.

Naduktalan laengen ni Clarise a mapukpukaw ti laptopna a Sony, Samsung tablet, MI cellular phone ken ti petakana a naglaon iti P2,000.00, IDs ken ti relo ni Jovita nga inkabilna iti rabaw ti lamisaan.

Naireport pay iti daytoy met laeng a petsa a natakawan ti balay a bambantayan ni Michael Manzano Galdonez, 33, awanan asawa, trabahador, a masarakan met laeng iti Barangay Patpata 1st.

Nasukalan ni Manzano nga awanen ti Samsung tablet, Huawei cellular phone ken ti petakana a naglaon iti nakurang a P1,000.00 nga inkabilna iti abayna iti uneg ti kuartona.

Mapapati a nargaan ti turog ni Manzano idi sinerrek ti mannanakaw ti kuartona sana kinurimes dagiti gamit ken kuartana.

Kabayatanna, nagreport idi agarup 8:45 ti bigat ti Marso 30 ni Fortunato Bactis Fernandez, 85, balo, balikbayan ken residente iti Barangay Calaoa-an, ditoy met laeng siudad, a natakawan bayat a nargaan ti turogna a mapapati a naiwayat iti agarup 10:00 ti rabii ti Marso 29.

Naduktalan laengen ni Bactis iti kabigatanna a natakaw ti dua a bagna nga agbiahe a naglaon kadagiti aruaten ken kuartana a P7,000.00, bag pack a nakaikabilan ti petakana a naglaon iti P100.00, ID ken passportna.

Mapapati a perdi ti serradura ti ridaw ken kuarto ti biktima ket ditoy ti simrekan ken rimmuaran ti mannanakaw.

Narekobre dagiti nagresponde a polis ti bag iti kamaisan, 50 metro ti kaadayona iti abagatan ti balay ti biktima ngem awanen dagiti kuarta ken ti G-Shock wrist watch nga agpateg iti P7,500.00-.

Segun iti polis, nakaala ti SOCO team a nangproseso iti nakapasamakan ti panagtakaw kadagiti lemma ket manamnama a makatulong daytoy iti pannakatiliw iti nagtakaw. (Tawid News)