Footer

Aglaklako iti tinapay, napaltogan

VIGAN CITY – Pimmusay iti ospital a pakaag-agasanna ti maysa nga aglaklako iti tinapay a pinaltogan dagiti armado a tattao a nagkalubbon iti motorsiklo sadiay Barangay Tamag ditoy siudad idi agsapa ti Marso 30.

Indeklara ti doktor a nangtaming kenkuana a natayen ni Geronimo Javier Quintinita, 41, balo, aglaklako iti tinapay, natibo ti Cagayan, residente iti Barangay Naglaoaan, Sto. Domingo, Ilocos Sur ngem agdama nga agindeg iti Barangay Sinabaan, Sta. Catalina, Ilocos Sur gapu iti grabe a sugatna iti makannigid a pispisna.

Segun iti polis ditoy, iyur-urayda ti resulta ti autopsia ken ni Javier.

Saan pay a nabigbig dagiti nangpaltog iti biktima ken no ania ti motibo ti pannakapaltogna.

Kas nailanad iti journal, idi agarup 6:25 ti agsapa idi Marso 30, agdaldaliasat nga agpa-abagatan iti Quirino Boulevard ti motorsiklo ni Javier a Kawasaki Rouser, awanan plate number, idi pinaltogan iti sumagmamano a beses ti dua a lalaki a nagkasakay iti single motorcycle a nakatiruan ti makannigid a pispisna.

Naglibas dagiti di suspek a nagpaabagatan.

Nangiwayat dagiti nagresponde a polis iti hot pursuit operation kadagiti naglibas a suspek ngem saandan a nasapulan dagitoy.

Nakarekobre dagiti inbestigador manipud iti Crime Laboratory Office ti Ilocos Sur Provincial Police Office iti tallo a naiputok a cartridge cases, 2 a naiputok nga slug, ken maysa a deformed slug a naggapu iti cal. 45.

Agtultuloy ti panagimbestiga ti polis mainaig iti nasao a pammaltog. (Tawid News)

Comments are closed.