Footer

Beautician, nanabtuog iti drug buy bust operation

LAOAG CITY – Kas paset ti pannakairusat manen ti Project Double Reloaded, nangiwayat ti kapolisan ditoy iti buy bust operation iti nagsulian ti T. Pasion Street ken T. Alonzo Street, ken dati nga M. Flor Street, bisinidad ti Brgy. 26, San Maurico, ditoy siudad a nagresulta iti pannakatiliw ti maysa a masipsiputan a drug personality idi rabii ti Marso 29.

Inaresto dagiti polis ni Fred Acoba y Amistosa aka “Freda”, 29, awanan asawa, self-employed a beautician, ken residente iti Baranglay 55-C Vira, ditoy siudad apaman a naiyawatna ti maysa a plastic sachet a naglaon iti mapapati a shabu iti maysa a polis a nagpammarang a poseur buyer.

Nakumpiska iti ikut ni Acoba ti maysa a bassit a heat sealed plastic sachet a naglaon iti mapapati a shabu; P500.00 nga addaan serial number BP945697 a naaramat iti buy bust operation; ken nangisit a Cloudfone smartphone,

Mapattapatta nga agdagsen ti nagatang ken nakumpiska a shabu iti 0.28 grams nga agbalor iti P2,800.

Kinuna ti kapolisan ditoy nga iti pannakaituloy manen ti anti-illegal drugs operation, saanda a maitulok a liwayan ti pagrebbenganda tapno malapdan ti panagraira ti aktibidad ti droga iti siudad.

Indagadag pay ti kapolisan ditoy kadagiti umili ti agtultuloy a suportada iti PNP tapno masustener ti momentum ti inisial a balligi dagiti illegal drug operations. (Tawid News/Laoag City police report)

Comments are closed.