Footer

IMPEACHMENT DAGITI NANGATO NGA OPISIAL ITI PILIPINAS

Komentario ni Eden A. Alviar

ADDA ngata positibo a pagbanagan dagiti naipila nga impeachment case iti House of Representatives maikontra kadagiti dua a kangatuan a lider ti Pilipinas?

Nangipilan ni Magdalo Rep. Gary Alejano iti impeachment case kontra ken ni Presidente Rodrigo Duterte idi Marso 16, 2017.

Inakusaran ti Kongresista ti Presidente iti “culpable violation of the Consitution, bribery, betrayal of public trust, graft and corruption, ken dadduma pay a nadagsen a krimen.

Nailanad iti impeachment complaint ti mapapati a pannakainaig ni Duterte iti Davao Death Squad idi mayor pay laeng iti dayta a siudad; ti nadara a gerra kontra illegal a droga ita ta presidente isuna a nakapasamakan dagiti maatap a summary killing dagiti rinibu a Pilipinos; ken ti maipagarup a saan a mailawlawag a kinabaknangna a naipalaon iti depositona iti banko ken dagiti saan a naideklarar a sanikua.

Patien ni Alejano a narigat ti gannuatna gapu ta bassit a bilang dagiti oposision iti Lower House, ngem mangnamnama iti suporta dagiti umili a saan a bimmotos iti Presidente, ken konsensia dagiti padana a mammanday-linteg.

Tinagilag-an met dagiti kaaliado ni Duterte iti House of Representaives nga idauluan ni Speaker Pantaleon Alvarez, ken iti Senado nga ipanguluan ni Senate President Aquilino Pimentel III ti impeachment complaint. Impalgakda a paset dayta ti destabilization plot kontra ti administrasion. Impasingkedda a saan nga agdur-as ti impeachment complaint gapu ta solido ti supermajority iti Kongreso a nakaikappenganda.

Immuna nga inrakurak ni Alvarez ti panggepna a mangiyusuatda met iti impeachment complaint maikontra ken ni Vice President Leni Robredo gapu iti betrayal of public trust babaen ti panagsarita ti Bise Presidente iti recorded video a naipabuya iti taripnong sadiay United Nations a nangiladawanna kadagiti mapaspasamak nga adu a pammapatay iti Pilipinas mainaig iti gerra ti gobierno kontra illegal a droga.

Inrakurak ni Duterte a saanna a kayat a mapilaan ni Robredo ti impeachment ta paset laeng ti “freedom of expression” ti inaramid ti Bise Presidente. Kinanunongan dayta ni Pimentel ken dagiti kakaduana iti supermajority iti Senado. Ngem impetteng ni Alvarez nga akemda iti Lower House ti mangtaming ti ania man a maipila nga impeachment complaint.

Idi Marso 20, 2017, nagipila met da Atty. Oliver Lozano ken Melchor Chavez iti impeachment complaint kontra ken ni Robredo, ken kiniddawda ti panangiyendorso ni Alvarez iti reklamoda. Inreklamoda ti Bise Presidente iti “betrayal of public trust and culpable violation of the Constitution” gapu iti recorded a mensahena iti UN maipapan kadagiti 7,000 a pammapatay iti Pilipinas mainaig iti gerra kontra illegal a droga.

Maysa pay a grupo dagiti abogado a supporter ni Duterte ti agpangpanggep a mangipila iti impeachment complaint ken ni Robredo.

Impalgak met ni Robredo a saan a “ground for impeachment” ti inaramidna, ken nakasagana isuna a mangdepensa iti reklamo kontra kenkuana.

Adda dagiti maayatan ken masuron kadagiti nagsina nga impeachment complaint ma-kontra iti Presidente ken Bise Presidente. Karbengan ti tunggal Pilipino ti agipila ti impeachment complaint kadagiti impeachable officials ta dayta ti lehitimo a wagas tapno mapadisida iti akem. Ngem dayta ket ad-addana laeng a pagsisinaen dagiti Pilipino, ken nakasaysayang dagiti pondo ken panawen ta riribukenna ti panagtrabaho dagiti opisial a nabiit pay a nagtakem.

Intuyang ti 1987 Constitution a mabalin a maikkat iti akem babaen ti impeachment and conviction gapu iti culpable violation of the Constitution, treason, bribery, graft and corruption, other high crimes or betrayal of public trust para ti Presidente, Bise Presidente, dagiti kameng ti Korte Suprema, miembro dagiti Constitutional Commission, ken Ombudsman.

Maipila ti impeachment complaint sadiay House of Representatives. Kasapulan ti 1/3 iti kadagupan dagiti kongresista tapno mayendorso sadiay Senado. Sadiay Senado, agakemto dagiti senador kas judge iti impeachment court nga idauluan ti Chief Justice ti Pilipinas. Nasken met ti 2/3 iti kadagupan dagiti senador tapno makombiktar ken maikkat ti opisial iti puesto.

Manamnama a narigat ti pannaka-impeach ken pannaka-convict ti Presidente gapu ta kontrolado ti administrasion ti Kongreso. Iti agdama a 292 a kameng ti House of Represemtatives, agdagup iti 267 a kongresista dagiti naikappeng iti supermajority a kaaliado ti Presidente. Kameng met dagiti kaaduan a senador iti supermajority. Dakdakkel ti gundaway nga agdur-as ti impeachment complaint maikontra iti Bise Presidente ta kontrolado ti supermajority ti Kongreso.

(Adda tuloyna)

Comments are closed.