Footer

2 babai, natiliw a nagtakaw idi Semana Santa

VIGAN CITY – Dua a babai a taga-Pangasinan ti nakasuan gapu ta natiliwanda nga akto a nagtakaw iti dua a pagtagi-lakuan ditoy siudad idi umuna a dua nga aldaw ti Semana Santa.

Naipaiman iti opisina ti City prosecutor ditoy siudad ti kaso a theft maikontra kada Janneth Gacosta Fernandez, 31, awanan asawa, ken residente iti Barangay Nalsian, Calasiao, Pangasinan; ken ni Norma Simlao Estacio, 74, balo, ken residente iti Barangay Caranglaan, Dagupan City, Pangasinan.

Natiliw ni Gacosta bayat ti panangitarayna iti pouch ni Amelita Peria De Guia, 61, naasawaan, negosiante, ken residente iti Barangay Taguiporo, Bantay, Ilocos Sur a sinikuatna iti mismo a pagtagilakuan daytoy.

Kas maibatay iti report manipud iti police station, idi agarup 8:45 ti bigat ti Abril 10, simrek ni Gacosta iti Rhonmels Dry Goods a masarakan iti umuna a kadsaaran ti public market ditoy ket nagpamma-rang a kustomer.

Segun ken ni Peria, pinanawanna ni Gacosta ta napan iti kaabayna nga stall ket iti nagsubli, nadatnanna ti suspek nga agsuksukain iti shoulder bagna a nakaparabaw iti lamisaanna.

Nasiputan ni Gacosta ti yaasideg ni Peria ket dagus a rimmuar iti stall.

Idi nakita ni Peria nga awanen ti pouchna, dagus a kinamatna ti suspek agingga a naipiskot daytoy. Narekobre iti ikut ti suspek ti pouch a naglaon iti passport, passbook ken kuarta a P1,500.00.

Kabayatanna, grocery items nga agbalor iti P2,035.50 ti pinadas nga ipuslit ni Simlao iti Jonathan-Janice Grocery a masarakan iti Del Pilar Street, Barangay VIII idi 6:00 ti malem idi Abril 11.

Segun ken ni Jingle Reclusado Gaspay, 38, superbisor, adda dua a di nabigbig a kadua ni Simlao idi simrekda iti paglakuan ket nagpammarangda a kustomer.

Kinuna ni Gaspay nga inkabil ni Simlao ti maysa a lata ti Similac Gain, 1800 grams, iti nagbaetan ti luppona sa rimmuar iti groseria ngem nasukalan ta natinnag daytoy. (Tawid News)

Comments are closed.