Footer

4 natakaw a kalding, natuntonan dagiti polis

STO. DOMINGO, Ilocos Sur – Natuntonan dagiti polis idi Abril 15 dagiti kalding a natakaw sadiay Barangay Panay ken Lussoc ditoy nga ili idi pay la Abril 5 ken 7 kasta met dagiti naglako ken gimmatang.

Nainaganan dagiti suspek a da Rodel Atones y De Gracia ken Bartolome Amano y Ramos; Gilbert Ola y Amistad, 17, baro; Jobel Blanes y Lorenzo, 17, baro; Jimboy Blanes y Lorenzo, 18, baro; ken Gilbert Ben, Jr., y Queddeng, 17, baro, residenteda amin iti Barangay Ayusan Norte.

Sakbayna, nagpatulong iti polis da Tirso Tactay, naasawaan, mangisursuro, residente iti Barangay Lussoc, Sto. Domingo ken Glenford Javier y Pido, 33, baro, mannalon, ken residente iti Barangay Panay, Sto. Domingo para iti pannakarekobre dagiti natakaw a kaldingda.

Iti panagsawar dagiti polis-Vigan, narekobreda ti tallo a kalding iti balay ni Mercy Velasco ken maysa a kalding iti balay ni Maricar Abad, agpada a residente iti Barangay Anonang Menor, Caoayan, Ilocos Sur.

Nabigbig da Tactay ken Javier a kaldingda dagiti nailako kada Velasco ken Abad.#