Footer

BANNER NEWS: Napaltogan a barangay captain, kalib-inna, naglasat iti operasion

BANTAY, Ilocos Sur -Nakiddaw iti opisina ti Ilocos Sur Provincial Crime Laboratory ti pannakaiwayat iti computerized facial composite illustration kadagiti suspek a nanggandat iti biag ti barangay captain ti Puro, Magsingal, Ilocos Sur idi malem ti Abril 17.

Madama a maob-obserbar iti Northside Doctors’ Hospital ti kasasaad da Puro Barangay Chairman Angelito Torricer y Tabucol, 56, ken ti live-in partnerna a ni Mary-Ann Raquel, 35, kalpasan a naglasatda iti operasion maigapu iti pannakapaltogda idi malem ti Abril 17.

Mapapati a ni Torricer ti puntiria dagiti suspek a patayen ket nairamraman laeng ni Raquel a kaduana idi napasamak ti pammaltog.

Maipalagip nga idi agarup 1:05 ti malem ti nadakamat a petsa, agdaldaliasat ti Kawasaki motorcycle a minaneho ni Torricer iti provincial road a sakup ti Barangay Casili, Sto. Domingo idi pinaltogan dagiti nagaruat iti amarilio a suspek a nagkalubbon iti nalabaga a Honda TMX 155 motorcycle nga awanan iti plate number.

Nagsagrap ni Torricer iti sugat iti bagina ken makannigid a takiagna idinto a nasugatan ti makannigid a buttock ni Raquel ket naitarayda iti Northside Doctors’ Hospital, Bantay.

Naglibas dagiti suspek a nakasakay iti motorsikloda iti saan nga ammo a direksion.

Nakarekobre dagiti personnel ti SOCO Clustered Kimat ken kameng ti PIDMB nga indauluan ni PCI Honesto T. Lazo, Jr. iti tallo a kapsula manipud iti cal. 45 iti nakapasamakan ti krimen.

Iti pannakaisurat daytoy, di pay ammo ti motibo ti nasao a pammaltog.

Kabayatanna, saan pay a nabigbig ti suspek a nangpaltog iti maysa a vulcanizer bayat ti panagdigosna iti banio iti abay ti shopna sadiay Barangay Baliw, San Juan idi malem ti Abril 18.

Agdama a maag-agasan ni Joseph Rapin y Valmoja, 43, naasawaan, ken residente iti Barangay Lapting, San Juan iti Gabriela Silang General Hospital a nakaiyalisanna manipud iti Suero General Hospital nga immuna a nakaitarayanna.

Iti panaglibasna kalpasan ti pammaltog, simrek ti suspek iti G and A General Merchandize Services Store ket ginammatanna ti akinkukua a ni Alyzza Khrizia Ricanor y Belen, 25, naasawaan, ket nagluganda iti Toyota Vios a kotse ti babai nga inaramat ti suspek a getaway vehicle iti panaglibasna nagpaabagatan direksion.

Idi nakaadayoda, imbilin ti suspek ti panangisardeng ni Ricanor iti lugan, pinungona dagiti ima ken saka ti hostage ken piniringanna ti mata daytoy ket isun ti nagmaneho iti kotse agingga iti nakadanonda iti Barangay Pagsanaan Sur, Magsingal a dimsaagan ti suspek sa naglibas iti saan nga ammo a direksion.

Nakarekobre dagiti inbestigador iti maysa a kapsula a nagtaud manipud iti cal. 45 iti crime scene. (Tawid News)

Comments are closed.