Footer

Karpintero, balo, napapatay sadiay Sinait ken Sta. Cruz

STA. CRUZ, Ilocos Sur – Sumagmamano laeng nga aldaw kalpasan ti pannakagandat ti biag ti maysa a barangay captain sadiay Sto. Domingo, dua a biag ti nagudas iti nagsina nga insidente ti pammaltog a napasamak iti Barangay Dili, ditoy nga ili ken iti Barangay Curtin, Sinait idi Abril 21.

Awanen ti biag a naidanon iti Sta. Lucia District Hospital ni Ferdinand Abella y Jallorina, 40, karpintero/mannalon ken residente iti Barangay Gabor Norte idinto a dead on the spot ni Valeriana Emely Baclig y Sinco, 50, balo, faith healer ken residente iti Barangay Magsaysay, Sinait gapu kadagiti grabe a sugat a linak-amda maigapu iti pannakapaltogda.

Segun iti report, adda iti dalanna nga aggawid ni Abella idi pinaltogan ti/dagiti di pay nabigbig a suspek.

Iti panagimbestiga ti SOCO team manipud iti Candon Crime Laboratory, nakarekobreda iti uppat nga awan naggianna a cartridge case ken maysa a buli manipud iti cal. 45.

Agtultuloy ti panagpalutpot dagiti polis no ania ti motibo iti pammaltog.

Iti met inisial a panagimbestiga iti pammaltog iti Barangay Curtin, Sinait, iyawid koman ni Baclig ti bakana idi pinaltogan ti/dagiti suspek a nagsagra-panna kadagiti sugat iti nadumaduma a paset ti bagina ken dagus a nakatayanna.

Nakarekobre ti SOCO team manipud iti Ilocos Sur Crime Laboratory iti 4 a kapsula manipud iti cal. 45 iti nakapasamakan ti krimen.

Di pay ammo ti motibo ti pammapatay. (Tawid News)

Comments are closed.