Footer

Kotse, naitapuak iti kapagayan, 12 naglugan nadundunor

QUIRINO, Ilocos SurSangapulo ket dua a tattao ti nadundunor idi naitapuak ti naglugananda iti kapagayan sadiay Barangay Urzadan, Cayus ditoy nga ili idi sardam ti Abril 21.

Mapapati a nadadael ti preno ti Nissan Van a kukua ken minaneho ni Fidel Aligway y Hermosisima, 66, ken residente iti J Basig, Cainta, Rizal bayat ti panagsalogna iti Quirino-San Emilio road, partikular ti Urzadan, Cayus ditoy nga ili a puon ti pannakaitapuakna iti kapagayan ken nakadundunoran iti sangapulo ket dua kadagiti 17 a naglugan a pasig a kameng ti Pamilia Agliway.

Nainaganan dagiti nadundunor a da Fidel Aligway, Evelyn Aligway, Jacob Owens Aligway, Kyshea Aligway, Jason Aligway Jr, Alexus lanes Fornoles, Moises Share Aligway, Alex Fornoles Jr, Princess Jaylen Aligway, Leonila Aligway, Alexander Fornoles ken Alexander Myee Fornoles.

Naitaray amin dagiti biktima iti Quirino Primary Health Care Facility para iti pannakaagasda.

Walo kadagiti biktima ti naiyalis idi agangay iti Candon City Hospital, Candon City para iti ad-adda pay a pannakatamingda.

Segun iti report, naggapu dagiti biktima iti Pagudpud, Ilocos Norte ket agturongda nga agpasiar iti Sagada, Mt. Province.

Nakaro ti dadael ti Nissan van.

Daytoy ti maikadua a daras nga adda naireport nga aksidente iti lugan ditoy nga ili iti las-ud ti makalawas.

Idi agsapa ti Abril 14, maysa a lalaki ti naireport a natay idi natinnag ti naglugananda nga Isuzu mini dump truck iti derraas sadiay Sitio Bab-asig, Patiacan, ditoy nga ili.

Naideklara a natayen idi maidanon iti Quirino Primary Health Care Facility ni Rudy Dadpa-as y Gomgom-o, 43, awanan asawa, ken residente iti nadakamat a barangay.

Mapapati a napukaw ni Luniza Beligen y Bawingan, 43, ken residente iti nasao met laeng a barangay, ti kontrolna iti manibela a puon ti nakatinnagan ti lugan iti derraas.

Iti kaudian a report, naggaareglo ti agsumbangir a partido kalpasan nga inkari ni Beligen nga itedna ti makolekta a kuarta manipud iti car insurance iti pamilia ti biktima.#