Footer

PANAGBISITA TI PRESIDENTE ITI BALLASIW-TAAW

Komentario ni Eden A. Alviar

AGSANGAPULO pay laeng a bulan ti administrasion ni Presidente Rodrigo Duterten ngem nakaiwayaten iti 15 official presidential visits kadagiti ganggannaet a pagilian iti lubong.

Itay napalabas a lawas, bimmisita ti Presidente ken ti official delegation-na sadiay Saudi Arabia, Bahrain ken Qatar. Dagitoy a tallo a pagilian iti Middle East ket paborito a turongen dagiti Overseas Filipinos Workers manipud pay idi Dekada 80 agingga iti agdama.

Kas kadagiti immunan a pagilian a binisita ti Presidente, nagbirok ken nakitulag iti nayon a foreign investment iti pagilian, ken nakitulag para iti nasingsinged a trade relations, ken pannakaitandudo ti pagimbagan dagiti migrant workers. Dinawatna pay ti suporta dagiti foreign Muslim leaders kadagitoy nabileg a pagilian para iti pannakagun-od ti mataginayon a kappia sadiay Mindanao nangruna kadagiti probinsia a ka-Musliman. Nakipagkonsulta pay kadagiti foreign leaders para ti seguridad iti rehion gapu kadagiti mapaspasamak a tension ken terorismo iti lubong.

Nakipagdialogo pay ti Presidente kadagiti pannakabagi dagiti Pilipino a mangmangged kadagitoy a pagilian nga addaan kadagiti agarup a 1.3 million nga OFW. Mairaman kadagiti pakaseknan dagiti OFW a naidatag iti Presidente ket ti panangtulong ti gobierno kadagiti naikkan iti amnestia a sigud a balud, ken dagiti nakakulong a nasentensiaanen ken sumangsango pay laeng kadagiti nagduduma a kaso nangruna kadagiti nasentensiaanen iti dusa a patay gapu iti pannakaaramidda iti nadagsen a krimen kas ti pammapatay ken mainaig iti illegal a droga.

Saan a mailibak ti kinalaing nga agbiahe ti Presidente ditoy Pilipinas ken ballasiw-taaw. Nabisitan ti Presidente idi 2016 dagiti pagilian iti Laos, Indonesia, Vietnam, Brunei, China, Japan, Thailand, Malaysia, Peru, New Zealand, Cambodia ken Singapore. Mairaman daytoy ti idadar-ay ti Presidente iti Association of South East Nation ken ti Asia Pacific Economic Cooperation meeting. Itay Marso, napan manen ti Presidente sadiay Thailand ken Myanmar.

Itay Pebrero, impalgak ni Presidential spokesperson Ernesto Abella a dimmanon iti P277 million dagiti ginastos ti gobierno para kadagiti 12 state and official visits ti Presidente kadagiti ganggannaet a pagilian itay 2016. Impakaammo met ni Abella a dumanon iti $5.85 billion dagiti naikari a foreign investments. Inrakurakna pay dagiti katulagan ken pautang a nakipinnirmaan dagiti lider ken pannakabagi dagiti gobierno kadagiti pagilian a binisita ti Presidente.

Ipampanakkel ti agdama nga administrasion a nabunga dagiti maisaysayangkat a presidential visits nangruna kadagiti nababaknang a pagilian gapu kadagiti kari a foreign investment. Napintas ti panggep ti Presidente kadagitoy a presidential visits ta para ti pagimbagan dagiti Pilipino. Ngem maabrut ngata ti gobierno ti dakkel a pondo a magastos kadagitoy a foreign trips ti Presidente? Naipatungpal kadin dagiti nagadu a kari a foreign investments idi 2016?

Impadpadamagen ti Malacañang ti plano ti Presidente a bumisita sadiay Rome, Italy, pakairamanan ti Vatican City a sentro ti Katoliko a Pammati, ken idauluan ni Papa Francisco. Nasayaat pay koma no ikanayonna ti sumarungkar kadagiti dadduma pay a pagilian iti Europa nga ayan dagiti adu nga OFW ken adu ti investmentda iti Pilipinas. Ngem bumdeng la ketdi ti Presidente gapu kadagiti dakes nga imbagbagana kadagiti kameng ti European Union gapu ti panangkondenarda kadagiti adu a human rights violations iti gerra ti gobierno kontra illegal a droga.

No dagiti immuna a nagtakem a Presidente iti Pilipinas ket nagbalin a prioridadda ti bimmisita sadiay Estados Unidos a maibilang a kasingedan a kaaliado ti Pilipinas iti seguridad ken komersio. Ngem iti agdama nga administrasion ket kasla awan pay iti plano ti Presidente a bumisita. Iyur-uray ngata ti Presidente ti imbitasion ni United States President Donald Trump?

Maysa kadagiti inur-uray a pagteng dagiti Pilipino kabayatan ti ASEAN ken APEC meeting ket ti pannakipagdialogo koma ti Presidente iti agdama idi a Presidente iti Estados Unidos a ni Barack Obama para ti pannakapasinged ti relasion dagiti dua a pagilian. Ti Estados Unidos ngamin ti kangrunaan nga investor iti Pilipinas ken kaaliadona iti seguridad ken depensa.

Ngem ni sigud a Foreign Affairs Secretary Perfecto Yasay Jr. ti nangibagi ti Presidente nga immuna a naipadamag a nairana a nagsakit kadagiti dinner a nairanta kadagiti delegado a lider dagiti pagilian. Inaklon ti Presidente nga inrantana ti saan a nakipagkita iti Outgoing US President gapu iti gurana kenkuana iti panangkritikar ni Obama iti nadara a kampania ti gobierno ti Pilipinas kontra iti illegal a droga.

Kinaykayat ketdi ti Presidente ti nakidialogo ken bimmisita iti China iti laksid dagiti tension iti nagbaetan dagiti dua a pagilian gapu ti susik iti teritorio iti West Philippine Sea wenno South China Sea. Uray pay indeklaran ti Permanent Court of Arbitration a teritorio ti Pilipinas ti sinakup ti China ket saan a nabigbig ken naipakat dayta a pangngeddeng ti International Court. Agtultuloy ketdi ti pannakapadur-as dagiti pasilidad ti China kadagiti sinakupda a teritorio ti Pilipinas.

Dakkel a pondo ti gasgastosen ti gobierno kadagiti foreign trips ti Presidente. Nasken nga agbalin koma a prioridad ti gobierno ti pannakapasayaat ti foreign relations kadagiti pagilian a nabayagen a nasinged ken tumultulong ti Pilipinas babaen ti ibibisita ti Presidente tapno nabungbunga ken saan a masaysayang dagiti adu a magasgatos kadagitoy nga isasarungkar ti Presidente iti ballasiw-taaw.

(Adda tuloyna)