Footer

SINURSURAN: Ti Leddaang iti Barukongna

Kolum ni Jobert M. Pacnis

TI panagrikep ti klase ti tagtagiuray ti kas kenkuana nga adipen ti tisa. Iti kastoy a kanito, mayinana bassit ti bagi ken panunotna a napakil iti panangtubayna kadagiti ubbing a naikumit kadakuada.

Nupay maysa a kinapudno a no amirisen ket awan ti makuna a bakasion kadakuada. Kalpasan a mangrikep ti klase, addaytan dagiti agsasamusam a paper works a masapul nga iringpasda. Pappapel a tulbek met tapno mapirmaan ti clearance-da sakbay a makapanda kadagiti pagnada (no kabalinanda man nga irapin) a kaduada dagiti pamiliada— pamilia a mabalin a nayadayo kadakuada gapu iti trabahoda.

Wen, nagbalinen a paset ti biagna dagiti ubbing a naitalek kadakuada. Dagitoy ti pagrikrikusan dagiti aldawna. Ken no dadduma, uray aldaw ti Sabado ken Domingo a para koma iti bukodna a pamilia, matagamtam pay laeng ta isu ti kidkiddawen ti panawen.

Ngem kalpasan laeng a makapapirmada ti clearance-da, addayta manen ti trabaho a sanguenda: mangpraktis kadagiti ubbing nga agpabuya iti piesta a tinawen nga angayen ti ili. Saan a mabalin nga awan ti ubbingda a makipaset iti nasao a programa. Uray isuda a mismo, masapul nga addada nga agpabuya.

Gapu ta bassitda laeng a mannursuro iti pagadalanda, adda batangda (kadayta a dua agingga iti tallo a lawas sakbay ti piesta) nga agpapraktis, wenno agbantay kadagiti mangpraktis a MAPEH teacher. Iti dayta a pannakabatangda, masapul nga isaganada metten ti gastuenda para iti pangngaldaw dagiti ubbing.

Wen, isuda a mannursuro ti mangpakan kadagiti ubbing nga agpraktis a makipaset iti maipabuyanto. Ket saan nga asi-asi dayta magasto nga agpangaldaw iti mapan a 50 nga ubbing malaksid kadakuada a mannursuro.

Ngem iti uppat a tawenna ditoy a pagadalan, saannan nga ikankano ti magastos nga isu pay a mangpakebbet ti barikesna para iti pamiliana. Adda dayta, rag-o, ragsak, a di magatadan no malagipna a paset dayta ti sakripisio ti kas kenkuana nga adipen ti tisa.

Pagaammona la unay a dagiti babassit a rag-o a maparnuay, dakkel a tulong iti salun-at ti tunggal maysa.

Ket kalpasan ti piesta, kada umuna a lawas ti Mayo, sumaruno manen dagiti umatiberret a seminar a masapul a dar-ayanda. Maysa wenno dua a lawas dayta depende iti suheto nga isuroda. Dagitoy metten a seminar, training, ti agbalin a rangtayda (mangrugi kadaytoy a tawen) iti panangpabaroda kadagiti lisensiada. Sakbay ngamin a mapabaroda ti lisensiada, masapul dayta kunkunada a CPD wenno continuing professional development trainings/seminars. Saanda a maka-renew no awan dayta.

Idi, no kunada a training wenno seminar, para iti panagdur-as ti mannursuro a yallatiwnanto met kadagiti ubbingna. Ken mausarnanto iti pannakaital-ona iti masanguanan. Ngem itan, nanayonanen ti benepisio a masagepsep kadagiti seminars, kas nadakamaten.

Apagleppas ti training, addayta manen ti Brigada Eskwela, kagiddan metten ti enrolment, a dumanon pay iti aldaw ti Sabado. Masapul a dar-ayanda dayta innem nga aldaw tapno makaalada iti tallo, wen, tallo laeng, nga aldaw a kas leave credits.

Ngem saan nga agpatingga dita ti papelda. Masapul a yaramidanda ti report dayta nga aktibidad, a nayatang ti tunggal maysa ti aldaw nga inakemanna.

Ket saan a mapupuotan, iti sumuno nga aldaw, panaglulukat manen ti klase! Sabali manen a tawen a mulienda dagiti ubbing. Sabali manen a pannakayadayo iti pamilia. Sabali manen a tawen a pannakilangen kadagiti nagannak, iti komunidad, ken kabaddungalan. Ngem no adda dayta dedikasion iti trabaho, napaneknekanna daytan, saan a mapupuotan ti panaglabas dagiti aldaw.

Ngem, manen, saan met a matallikudan ti leddaang a kumalbit iti barukong ken isipna no kasta a panagririkep ti klase.

Adda maukrit a leddaang iti pusona saan a gapu ta mayadayo kadagiti ubbing iti dua a bulan. Ken saan a gapu ta manayonan manen ti edadna ket dumukir latta ti kinapudno a tumaeng manen. Leddaang saan a gapu ta dina masinunuo no adda met la naadal dagiti ubbing a naglabas kenkuana.

Nalabit tagiragsaken dagiti kas kenkuana dagiti aldaw kalpasan ti panagrikep ti klase. Wen, ta nalabit, agsasarunon a bakasion, padaya, ragragsak ti nakalista kadagiti pagikur-itanda a masapul a dar-ayanda.

Puera delos Buenos a kunada, addada dagiti kas kenkuana a likudanda pay laeng dagiti report-da ket yun-unada ti bakasion grande. Kakaasinton, piman, ti pagadalan a mangikamkamakam kadagita a report. Pakaung-ungtanda no dadduma iti ngato. Sadanto agreklamo no bassit ti maawatda a performance-based bonus wenno PBB.

Wen, tunggal panagrikep ti klase, adda ukritenna a leddaang iti barukongna. Leddaang a masapul nga awatenna ken pagsarminganna tapno iti masanguanan, awanton daytoy.

(Adda tuloyna)