Footer

BANNER NEWS: Wagayway, logo ti CPP-NPA, nayisprey waiting sheds 3 ili

SAN JUAN, Ilocos Sur – Aramid dagiti kameng ti lokal a terorista a grupo wenno aktibista nga agtutubo ti pannakaisprey iti pinta dagiti waiting shed iti Sinait, Cabugao ken daytoy nga ili iti itatapog ti Semana Santa?

Daytoy ti kitkitaen ti kapolisan gapu ta malaksid kadagiti balikas nga agal-allukoy kadagiti kumappon iti CPP-NPA, adda pay dagiti waiting shed a naispreyan iti wagayway/logo ti nasao a grupo.

Mapapati a naisayangkat dagiti panagisprey iti pinta kadagiti waiting shed idi karabian ti Abril 10 wenno iti nariwet nga agsapa ti Abril 11.

Immuna a naireport ti pannakaisprey iti pinta dagiti waiting shed iti national highway ti San Juan idi agarup 6:00 ti agsapa ti Abril babaen ti tawag iti telepono ti maysa a maseknan nga umili.

Iti panagpatrolia dagiti polis, naduktalanda a naispreyan dagiti waiting shed iti Barangay Labnig, Lapting, Refaro, Resurreccion, Saoang ken Baliw a nakaipintaan iti nalabaga ken kolor dapo a balikas: SUMAPI SA NPA- PKM; VIVA CPP NPA –PKM; REBOLUSYON SAGOT SA KAHIRAPAN-PKM; KABATAAN SUMAPI SA BHB – KM; ken MABUHAY IKA-48 ANIB NG NPA.

Naduktalan met dagiti polis-Cabugao bayat ti panagpatroliada idi agarup 7:00 ti bigat ti nadakamat a petsa ti pannakapasuyot iti nalabaga ken maris-dapo a pinta dagiti waiting shed ti Barangay Sagayaden, Barangay Bonifacio ken ti arko ti ili a madalanan ti national highway.

Kas iti San Juan, naispreyan dagiti waiting shed ken ti arko ti Cabugao iti SUMAPI SA NPA- PKM ken VIVA CPP NPA –PKM.

Kabayatanna, idi agarup alas 8:00 ti bigat ti nadakamat a petsa, naduktalan dagiti mobile patrollers ti Sinait police station a naispreyan iti umasping a balikas a mapapati a naggapu iti nadakamat a terorista a grupo ti dua a waiting shed ti Barangay Pug-os, ti welcome arc ti Barangay Quimmallogong, ti waiting shed a masarakan iti highway daytoy a barangay nga agturong iti Barangay Zapat, iti road railings iti asidegna, kasta met iti Sapilang bridge iti bisinidad ti Barangay
Calanutian, Teppeng Bridge iti bisinidad ti Barangay Magsaysay, ken iti waiting shed iti Barangay Magsaysay.

Naispreyan pay ti boundary arc ti Sinait a masarakan iti national highway ti Barangay Pug-os iti puraw a nakaipintaan ti MABUHAY IKA 48 ANIB NG BHB PKM.

Suspetsa ti kapolisan ti Cabugao nga aramid daytoy ti CNN a kaaliado ti CPP/NPA agsipud ta adda dagiti naireport iti kallabes a sightings ti grupo dagiti lokal a terorista iti nadumaduma a barangay daytoy nga ili.

Iwaywayat met ti kapolisan ti Sinait ti naing-inget a balidasion ken panagimbestiga ken panangiwayat iti precautionary measures tapno makontra ti plano ken posible nga iraraut/pammutbuteng ti nadakamat a terorista a grupo. (Tawid News)

Comments are closed.