Footer

EDITORIAL: Kinatalged dagiti Public Utility Vehicle

NAKAAM-AMES dagiti mapaspasamak nga aksidente kadagiti kalsada iti Pilipinas a mabalin a maliklikan koma no adda naan-anay a panagannad ken nasayaat a pannakamantiner dagiti agtartaray a lugan ken kadagiti dalan.

Kalaksidan dagiti inaldaw a maipadpadamag a trahedia iti kalsada a pakaibuibuisan ti biag kadagiti nagduduma a paset iti pagilian, maysa manen a nakaladladingit nga aksidente ti napasamak sadiay Carranglan, Nueva Ecija idi Abril 18, 2017. Agdagupen iti 35 a nakalugan iti Leomarick Bus pakairamanan ti drayber ken dagiti pasahero iti natay, ken 38 dagiti nasugatan iti pannakatnag ti lugan iti nauneg a derraas iti abay ti kalsada a naipakalipkip iti bantay.

Maibasar kadagiti report, ti bus ket naggapu iti Isabela ken agturong iti Ilocos Sur ti agdaldaliasat nga agpasalog iti Cagayan Valley – Nueva Ecija Highway ti mapapati a naawanan iti preno ken bimtak ti maysa kadagiti akinsango a pilidna a gapu ti nakaitapuakanna iti 24 a metro ti kaunegna a rangkis. Naipadamag a ti bus ket nagkarga iti nasurok a 70 a pasahero a nasursurok nga amang ngem ti 45 a kapasidad dagiti tugaw ti lugan. Napardas ti taray ti lugan ta simmayag daytoy idi matnag iti derraas ken saan a naisadsad kadagiti sanga dagiti kayo iti asideg ti kalsada.

Naipadamag pay a giwang-giwang ken naingpis dagiti concrete barrier iti abaga ti kalsada a nangtiped koma ti pannakatnag ti lugan. Awan pay dagiti “warning signs for accident prone area” iti dayta a paset ti kalsada tapno maballaagan dagiti motorista. Segun iti report, addan innem nga aksidente ti lugan ti napasamak iti dayta a paset ti kalsada ita a tawen laeng.

Nangisayangkaten ti Land Transportation Franchising and Regulatory Board ti pakauna nga imbestigasion iti aksidente ken sinuspendeda ti prangkisa ti Leomarick Bus. Naduktalan a lehitimo ti prangkisa ti bus, ken idi pay laeng 2006 ti modelo ti lugan.

Nakaam-ames a trahedia ti napasamak iti Leomarick bus ta adu a biag dagiti nakettel ken adu dagiti nasugatan, ken adu met a pamilia dagiti naulila ken agparparikut iti agdama. Nadagsen ti problema dagiti naapektaran a pamilia nangruna iti danios ken gastos ta uray no addaan iti insurance ti Leomarick Bus ket saan daytoy a dakkel a kompania.

Iti kaadu dagiti natay ken nasugatan, marigatan la ketdi ti kompania nga agbayad iti danios. Awan met ngaruden ti criminal liability ti kompania kadagiti natay ken nasugatan a pasahero ta natay metten ti drayber, ket agpatingga laeng iti civil liability a no agdalan ti kaso iti husgado ket dumanon iti napaut a panawen.

Itay Pebrero, maysa met a nakaam-ames a trahedia iti kalsada ti napasamak sadiay Tanay, Rizal. Agdagup iti 15 dagiti natay a nakalugan iti Panda Coach Tourist Bus a bimmangga iti poste ti elektrisidad ken kayo iti kurbada a paset ti highway iti Magnetic Hill. Nairaman a natay ti drayber ken dagiti 14 nga estudiante iti Bestlink College of the Philippines a mapan koma ag-summer camp kas paset ti National Service Training Program para kadagiti agad-adal iti kolehio. Maibasar iti report, saan a nakontrol ti drayber ti bus ken naawanan ti preno ti lugan a gapu ti nakaidungparan ti behikulo.

Awan ti agayat iti aksidente ngem no dagiti drayber ket nasanay ken ammoda ti agannad, ken no dagiti maseknan nga ahensia ti gobierno ket aramidenda a nasayaat dagiti akemda, mabalin a malisian koma dagiti trahedia kadagiti kalsada. Nalukay ti Land Transportation Office iti panangited ti lisensia nga agmaneho uray dagiti professional driver’s license. Nakapsut met ti ngipen ti LTFRB a mangipakat kadagiti pagannurotan para kadagiti pang-publiko a lugan. Adda met pagkamtudan ti Department of Public Works and Highways ken dagiti local government units iti pannakaipakat dagiti safety measures kadagiti kalsada tapno maliklikan dagiti aksidente.

Kaaduan kadagiti pasahero dagiti pang-publiko a lugan ket dagiti kadawyan a tattao a saan a makabael a gumatang kadagiti bukodda a behikulo. Isuda dagiti agan-anus ken kasla mangipuspusta ti karadkadda a lumuglugan kadagiti public utility vehicles ta saanda nga ammo ti kabaelan ti drayber ken kondision ti paglugananda.

Iti kaadu dagiti pasahero, gundawayan met dagiti kompania ken dagiti drayber ti agilugan iti agsobsobra ngem ti seating capacity tapno ad-adu ti mapastrekda a ganansia wenno matgedanda. Uray no agkurang ti inana ken maintenance check ti lugan no kasta a panawen a kaadu ti pasahero ket agtultuloy ti panagbiahe dagiti PUV. Maliwayan met dagiti maseknan nga ahensia ti gobierno ti pannakaipakat dagiti nayetnag a pagannurotan tapno mapasingkedan ti kinatalged dagiti pang-publiko a lugan.

Iti pannakasaluad ti kinatalged dagiti PUV ken dagiti kalsada, nasken ti panagtitinnulong ti gobierno, ti akinkukua ken agmanmaneho ti lugan ken uray mismo dagiti pasahero. (Eden A. Alviar)

Comments are closed.