Footer

EDITORIAL: Panangngilin ti Semana Santa dagiti Pilipino

NGILINEN ita a lawas dagiti Katoliko iti intero a lubong ti Semana Santa, nangrugi idi kalman a Domingo Ramos ken aggibus inton umay a Domingo Panagungar. Iti daytoy a Nasantuan a Lawas, rambakan dagiti Katoliko ti pakabuklan ti pammatida – Misterio Paskual – ti pannakaparparigat, ipapatay ken panagungar ni Apo Jesukristo.

Naisangsangsangayan ti panangngilin dagiti Pilipino a Kristiano iti Semana Santa no maidilig kadagiti dadduma a pagilian iti lubong a kaaduan kadagiti umili ket Katoliko. Dagiti narelihiosuan a tradision ken kultura ket natawid dagiti Pilipino kadagiti Kastila a nangisangpet ti Kristianismo – Katoliko a Pammati iti Pilipinas idi Tawen 1521. Kalpasan ti dandani agliman a siglo a naisangpet ti Pammati ken Kristo iti Pilipinas, kasano ti kauneg ken panangibiag dagiti Pilipino iti inawatda a Pammati?

Mabigbig ti Pilipinas kas umuna ken kangrunaan a pagilian dagiti Kristiano iti intero nga Asia. Adda man dagiti nagduduma a Pammati kas ti Islam, Budismo, Hinduismo ken dadduma pay a sekta ti Kristianismo, walopulo a porsiento iti kadagupan dagiti 104 million a papulasion ti Pilipinas ket Katoliko. Kaaduan pay kadagiti opisial iti pagilian ket Katoliko, ken adu kadakuada dagiti nagadal ken nagturpos kadagiti eskuela Katolika.

Ni Presidente Rodrigo Duterte ket nagadal iti eskuela Katolika manipud elementaria agingga iti kolehio. Nagturpos isuna iti Abogasia sadiay San Beda College. Adu met a kameng ti gabinete, senador, kongresista ken nangato nga opisial ti agdama nga administrasion, ken uray dagiti lokal a gobierno ken nagduduma nga ahensia ti nagadal ken nagturpos kadagiti nagduduma nga eskuela Katolika.

Adu kadagiti naglabas ken agdama a nangato nga opisial iti Pilipinas ket produkto dagiti mararaem nga eskuela Katolika kas kada sigud a Presidente Joseph Estrada, Gloria Macapagal Arroyo ken Benigno Aquino III. Nagadal pay iti eskuela Katolika dagiti nalatak ken kontrobersial nga agdama nga opisial a da Sen. Leila de Lima, Senate President Aquilino Pimentel III, Justice Sec. Vitaliano Aguirre II, House Speaker Pantaleon Alvarez, House Majority Leader Rodolfo Fariñas, ken adu pay a nangato a lider iti pagilian.

Sigud met a seminarista ni dati nga Interior and Local Government Secretary Ismael Sueno nga inikkat ni Presidente Duterte iti gabinete gapu iti pammabasol iti kurapsion ken panagabusar iti turay.

Ania ti rason nga adda dagiti opisial a namuli ken natubay kadagiti eskuela Katolika bayat ti panagadalda ket saandan a maibiag dagiti na-Kristianuan a panursuro a naipaganetget kadakuada idi agbasbasada? Gapu kadi iti nalaus a panagtarigagay iti kinabaknang ken turay?

Kadagiti naglabas nga administrasion, ken uray itay nabiit, naikkat da Immigration Deputy Commissioners Al Algosino ken Michael Robles, agpada a kaeskuela sadiay SBC College of Law ken ka-brod iti fraternity ti Presidente ken Justice Secretary dagiti naimbestigaran ken naikkat iti serbisio gapu ti panagawatda iti P50 million a pasuksok manipud ken ni gambling tycoon Jack Lam.

Idi Ash Wednesday wenno Mierkoles Kurkuros, nairana a panagbotos dagiti kongresista para iti second reading ti gakat a mangisubli iti Dusa a Patay babaen ti pinnapigsaan iti timek. Adu kadagiti kongresista a produkto ti eskuela Katolika, ken adu kadakuada dagiti nakurusan iti uging dagiti mugingda ti nagpasindayag a nangipukkaw ti yaanamongda iti pannakaisubli iti Dusa a Patay. Nagangayanna iti maikatlo ken maudi a pannakaibasa ti gakat a mangisubli iti Dusa a Patay ket 217 dagiti pimmabor a kongresista, ken 54 laeng dagiti kimmontra.

Addan ti gakat sadiay Senado ket addanton kadagiti senador no aprobaranda ti pannakaisubli iti Dusa a Patay. Nagrigat a panunoten a ni Sen. Manny Pacquiao a sigud a Katoliko ngem maysan a born-again a mangipaspasindayag nga ikaskasabana ti Sao ti Dios ket idurduronna ti pannakaipasa ti Dusa a Patay.

Iti laksid ti panangkontra ti Iglesia Katolika ken dagiti human rights groups kadagiti mapaspasamak a pammapatay iti gerra ti gobierno kontra ti illegal a droga, ket inaldaw latta nga adda dagiti mapasag kadagiti police operations, ken mapapati a biktima ti extra judicial killings. Uray dagiti lider ti Pammati ket nagduduma dagiti panirigan ken kapanunotanda kadagiti mapaspasamak a pammapatay.

Saan laeng a dagiti opisial a produkto dagiti eskuela Katoliko ti mairamraman kadagiti kontrobersia a mailabsing iti panursuro ti Dios. Gapu iti pammabasol iti kurapsion, nakadarum met ni Senador Joel Villanueva, anak ti nalatak a born-again pastor ti Jesus is Lord. Agtultuloy met ti panagaapa dagiti agkakabsat nga annak ti pundador ti Iglesia Ni Cristo.

Dagitoy a pasamak iti Pilipinas ket ipaduyakyakna ti langa ti pammati ken Kristo dagiti kaaduan a Pilipino. Adu a Kristiano ti mangngilin iti Semana Santa. Ngem kalpasan daytoy a lawas, subliandanto manen ti sigud a wagas ti panagbiagda. Pudno a kaaduan kadagiti Pilipino ket Kristiano. Ngem mayanninawda kadi ti kina-Kristianoda iti inaldaw a panagbiagda? (Eden A. Alviar)

Comments are closed.