Footer

Impeachment dagiti Nangato nga Opisial iti Pilipinas

Komentario ni Eden A. Alviar

(Tuloyna)

Iti pakasaritaan ti Pilipinas, daydi Presidente Elpidio Quirino idi 1949 ti immuna a pangulo ti Pilipinas a napilaan ti impeachment complaint gapu ti mapapati a panagaramatna ti pondo ti gobierno para ti nagarbo a pannakapapintas ti Malacañang, ken pannakainaigna iti maatap a diamond smuggling. Nadismis dagiti reklamo iti Congressional committee.

Naidarum met ti impeachment daydi Presidente Diosdado Macapagal idi 1964 gapu kadagiti nagduduma a pammabasol pakairamanan ti illegal importation iti bagas, illegal a panagikkat kadagiti opisial ti gobierno, panagaramat ti military tapno butbutngenna ti oposision, ken ti panangimandarna ti pannakapagawid ti Amerikano a negosiante nga adda iti kustodia ti Kongreso kas panaglabsing ti panagsina ti bileg iti gobierno. Ngem sigida a nadismis ti kaso iti Congressional committee.

Naireklamo met ti impeachment daydi Presidente Ferdinand Marcos babaen kadagiti 56 a kameng ti Batasang Pambansa idi 1985 gapu iti economic plunder, unexplained wealth, granting monopolies to cronies, ken dadduma pay a krimen. Ngem sigud a dinismis ti Batasan Pambansa ti reklamo.

Uray daydi Presidente Corazon Aquino, naireklamo met iti impeachment idi 1988 gapu iti mapapati a panaglabsing iti 1987 Constitution. Ngem naibasura a dagus ti reklamo iti House of Representatives.

Nagbalin a kontrobersia ti impeachment complaint kontra ken Presidente Joseph Estrada idi 2000 gapu ti pammabasol kenkuana iti panagawatna iti jueteng payola, unexplained wealth, panangpabor kadagiti gagayemmna a negosiante, ken culpable violation of the Constitution.

Nag-walkout idi dagiti congressmen-prosecutors gapu ta dagiti senador-judges ket saanda nga impalubos ti pannakalukat ti maikadua a sobre a mapapati a naglaon iti ebidensia kontra ken ni Estrada. Dayta ti nangsilmut ti mass rally sadiay EDSA shrine a nakaigapuan ti panangibabawi ti suporta dagiti opisial ti military ken dadduma pay nga ahensia ti gobierno, a nakaigapuan ti pannakapadisina iti turay.

Namin-uppat met a napilaan iti impeachment complaint kabayatan ti siam a tawen a panagakem ni Presidente Gloria Macapagal-Arroyo idi 2005, 2006, 2007, ken 2008. Dagiti reklamo ket naibasar iti alegasion a nagsuitik isuna idi 2004 Presidential Election, ken pammabasol ti corruption pakairamanan ti NBN-ZTE deal, Northrail project, ken Fertilizer scam. Ngem dagita a reklamo ket naibasura iti House of Representatives.

Napilaan met iti impeachment complaint ni Presidente Benigno Aquino III idi 2013 gapu ti alegasion a culpable violation of Constitution gapu ti panangiyakarna dagiti pondo para iti Development Acceleration Projects funds.

Dagiti dadduma pay nga opisial ti gobierno a naidarum iti impeachment ket ni Ombudsman Aniano Desierto gapu iti nabuntog a panagimbestigarna kadagiti kaso ti kurapsion. Napilaan met ti impeachment complaint ni Commission on Elections Commissioner Luzviminda Tangcanco gapu ti alegasion ti graft and corruption, betrayal of public trust and culpable violation of the Constitution gapu ta mapapati nga adda pinaboranna a kompania iti multi-billion-peso voters registration and information system project. Napilaan pay iti impeachment complaint ni sigud a Chief Justice Hilario Davide, Jr. gapu ti culpable violation of the Constitution, betrayal of the public trust and other high crimes.

Naidarum met iti impeach-ment ni sigud a COMELEC Chairman Benjamin Abalos mainaig iti ZTE national broadband network (NBN) deal ken Hello Garci controversy, ngem naglusulos iti puesto sakbay a nagdur-as ti reklamo. Na-impeach met ni Ombudsman Merceditas Gutierrez idi 2011 gapu ti kinabassit ti gapuananna kadagiti kaso idi panawen ti Arroyo Administration, ngem naglusulos isuna iti puesto.

Idi Disiembre 2011, 188 kadagiti 285 a kongresista ti pimmabor iti Articles of impeachment kontra ken ni Supreme Court Chief Justice Renato Corona gapu kadagiti pammabasol ti graft and corruption. Babaen ti botos ti majority, nakombiktaran ken napadisi ni Corona.

Tallo pay laeng dagiti opisial a naballigi a na-impeach sadiay House of Representatives – da Abalos, Gutierrez ken Corona. Ngem ni laeng Corona ti nakombiktaran ken naikkat iti akem.#

Comments are closed.