Footer

Pannakaisanud Manen ti Eleksion ti Barangay ken SK

RUMBENG kadi a maisanud manen ti pannakaangay ti eleksion iti Barangay ken Sangguniang Kabataan a nakaiskediul ita a tawen? Maiparbeng kadi a madutokan laengen dagiti agakem nga opisial dagiti barangay no maitantan ti eleksion?

Dagitoy ti nagkaykaysa a saludsod dagiti umili mainaig iti tarigagay ni Presidente Rodrigo Duterte a mangisanud ti eleksion iti Barangay ken SK a maangayto koma inton Oktobre 23, 2017, ken ti kalikagumna a mangdutok laengen kadagiti opisial ti barangay.

Kayat ni Duterte a maisanud manen ti eleksion iti Barangay ken SK tapno maliklikan ti pannakausar ti drug money ket malisian ti panagraira ti narco-politics iti Pilipinas. Patien ti Presidente a dumanonen iti 40 a porsiento iti kadagupan dagiti agdama nga opisial iti barangay dagiti adda pakainaiganna iti illegal a droga, ken maaramat la ketdi ti drug money no matuloy ti eleksion.

No matuloy ti pannakaisanud ti eleksion ti Barangay ken SK, daytoyton ti maikadua a gundaway a mapasamak kabayatan ti Duterte Administration. Naangay koma daytoy idi Oktobre 2016 ngem inlungalong ni Duterte ti pannakaitantanna gapu met laeng iti rason a mausar ti drug money ken malisian ti narco-politics. Dua a lawas sakbay ti naituding a Barangay and SK Elections idi 2016, pinirmaan ni Duterte ti gakat a pannakaisanud ti eleksion ken panagtuloy iti akem dagiti nabutosan nga opisial idi 2013 ken aggibus ita a tawen.

Sadiay Kongreso, impeksan dagiti kaaliado ni Duterte ti panangipasada iti gakat kas panangsuportada iti panggep ti Presidente. Ngem addan dagiti lider iti oposision ti kontra iti pannakaisanud manen ti eleksion iti barangay ken SK, ken ti pannakadutok dagiti agtakem nga opisial ta maikaniwas iti Konstitusion.

Nangipilan ni Surigao del Norte 2nd District Representative Robert Ace Barbers iti House Bill 5359 a mangisanud inton Mayo 25, 2020 ti eleksion iti Barangay ken SK, ken mangipalubos iti Presidente a mangdutok kadagiti officer-in-charge dagiti barangay.

Impalgaken ni House Speaker Pantaleon Alvarez iti suportana iti panggep ti Presidente, ngem nasken ti pannakaamendar ti Local Government Code of 1991 ta ipawil dayta ti panangdutok kadagiti agakem nga opisial iti barangay. Impakaammona a mangisagsaganan iti bukodna a bersion iti gakat para ti pannakaisanud ti eleksion ken pannakadutok dagiti opisial iti barangay.

Impeksa met ni Liberal Party President Senator Francisco Pangilinan ti saanda a yaanamong iti pannakaisanud manen ti eleksion iti barangay ken SK ta rabsutenna ti kalintegan dagiti umili a mangpili kadagiti bukodda a mangidaulo kadakuada kadagiti barangayda. Uray dagiti oposision iti House of Representatives ket inyetnagda ti panangkontrada iti gakat a mangisanud manen ti eleksion iti Barangay ken SK.

Inrakurak metten ni Commission on Elections Chairman Andres Bautista a nasken a maipasa agingga iti Hulio 2017 ti gakat a mangisanud ti eleksion iti barangay ken SK tapno masinunuoda ti aramidenda no agtuloy wenno maisanud ti panagpipili.

Nasken ti panagsagana ti COMELEC no matuloy wenno saan ti eleksion ta agdagup iti 42,036 dagiti barangay iti Pilipinas. Kapada a bilang dayta dagiti mabotosan a Punong Barangay wenno Kapitan ken SK Chairman, mainayon pay dagiti pito a kagawad iti Barangay Council ken SK Council iti tunggal barangay wenno agdagup iti 588,504 a kagawad iti Barangay ken SK.

Adu nga umili dagiti mangayat a matuloy ti eleksion iti barangay ken SK nangruna para kadagiti opisial ti Barangay Council ta idi pay laeng koma 2016 a naggibus ti terminoda ket kasapulan ti baro a mandato dagitoy nga opisial. Ti anag ti demokrasia ket ti pannakaipaay ti kalintegan kadagiti umili nga agpili babaen ti eleksion kadagiti kayatda a mangidaulo kadakuada. Adu dagiti umili ti saandan a kayat dagiti opisialda ket tarigagayandan a sukatan ida babaen ti eleksion.

Adda man napateg a makaigapu tapno maisanud manen ti eleksion iti barangay ngem saan koma a maiwalin ti kalintegan dagiti botante nga agpili kadagiti kayatda a mangidaulo ta dayta ket intuyang ti Konstitusion. Naminsanen a naisanud ti eleksion iti barangay ken SK, ita maitantan manen. Adda kadi sabali a rason iti dayta a panggep ti administrasion?

Inkari ni Duterte idi panawen ti kampania a paksiatenna ti illegal a droga ken dadduma pay a krimen iti Pilipinas iti las-ud iti tallo agingga iti innem a bulan. Ngem idi malpas dayta a panawen, dimmawat iti pawayway agingga iti panaggibus ti terminona inton 2022 gapu kano ti kinakaro ti problema.

Adda iti administrasion ti bileg tapno madalusan dagiti barangay kadagiti opisial nga adda pakainaiganna iti illegal a droga. Ngem ania ngarud ti inar-aramid dagiti maseknan nga ahensia ti gobierno tapno napaksiat dagiti rinuker nga opisial iti barangay?

Agamak ken agatap dagiti mangilala iti demokrasia nga umili a ti pannakaisanud ti eleksion iti barangay ken SK ken pannakadutok dagiti opisial, ket paset ti panagsagsagana ti administrasion tapno naannayas ti pannakaiduron ti mailunglungalong a Federalismo s sistema ti gobierno ta dagitoyto nga opisial ti maaramat nga instrumento para panagballigina iti Plebisito, ket maar-aramat laeng a rason ti panagraira ti illegal a droga.

Napateg ti akem dagiti opisial iti barangay ta isuda dagiti parupa ti gobierno a mangiturong kadagiti umili para iti pannakagun-od ti kappia, panagkaykaysa ken panagdur-as ti barangay. Nasken ngarud a dagitoy nga opisial ket adda kadakuada ti talek ken kompiansa dagiti umili a magun-od laeng no dagiti umili ti nangisaad kadakuada iti akem. (Eden A. Alviar)

 
Comments are closed.