Footer

Pintor, dimmungpar iti poste ti silaw, natay

STO. DOMINGO, Ilocos Sur – Saanen a naidanon a sibibiag iti ospital ti drayber ti motorsiklo kalpasan a dimmungpar iti poste ti silaw sadiay Barangay Cabigbigaan ditoy nga ili idi sardam ti Abril 12.

Indeklara ti doktor ti Northside Doctors’ Hospital, Bantay, Ilocos Sur nga awanen ti biag ni Alberto Padua y Naceno, 45, naasawaan, pintor ken residente iti Barangay Panay Sur, Magsingal, Ilocos Sur idi naidanon iti nasao a balay-pagagasan.

Iti panagimbestiga dagiti polis, sakbay aksidente, nagiinom da Padua ken maysa a katrabahuanna.

Mapapati a napukaw ni Padua ti kontrolna iti manibela bayat ti panagdaliasatna nga aggawid a nagresulta iti panangdungpar ti motorsiklo iti poste ti silaw iti Barangay Cabigbigaan a puon ti nagsagrapanna iti nakaro a dunor iti ulona.

Nakaro met ti dadael ti motorsiklo ti biktima.#

 
Comments are closed.