Footer

Retirado a polis, gimmerret iti tengnged

TAGUDIN, Ilocos Sur – Susik a natibnokan iti arak ti nakagapu iti pannakagerret ti tengnged ti maysa a mannalon a puon ti nakatayanna idi sardam ti Abril 9 sadiay Sitio Caloocan, Barangay Libtong, ditoy nga ili.

Kanaig daytoy, nakasuan iti murder ni Virgilio Barnachea Cuaresma, 66, naasawaan, retirado a PNP member ket naiyendorso ti kaso iti Opisina ni Associate Provincial Prosecutor, Vigan City a nai-docket iti I-03-IN Q-17D-00071.

Sakbay ti nasao nga insidente, naireport a nagriri da Robert Barnachea Lucena, 42, naasawaan, mangngalap ken residente iti nadakamat a barangay ken ti kayongna.

Saan a nailanad iti blotter no ania ti nakagapu iti panagsubang dagiti dua. Ngem mapapati a nakainom ni Barnachea iti dayta a sardam.

Segun iti report, nakita ti biktima ti suspek nga adda iti Vicky’s Store ket inasitganna sana dinamag no ania ti problema daytoy.

Mapapati nga idi nakita ti biktima nga adda armas ti retirado a polis, naggawid iti balayda sa nangala iti bolo ket sinurotna ti suspek iti pagbasketbolan.

Ditoy a napasamak ti panagkabil dagiti dua a nagtungpal iti pannakabagsol ti tian ti biktima.

Nagtaray nga immadayo ti suspek ngem sinurot ti biktima agingga a nakusbo daytoy iti daga.

Iti daytoy a punto, nagsubli ti suspek ket mapapati a ginerretna iti namindua ti tengnged ti biktima sa naglibas.

Naitaray ti biktima iti Ilocos Sur District Hospital, Barangay Bio, ngem naideklara a dead on arrival.

Naaresto met ti suspek ket naipan iti police station para iti dokumentasion ken umisu a disposision.

Saan a narekobre dagiti polis ti kitchen knife nga inusar ti suspek. (Tawid News)

Comments are closed.