Footer

Saan a panagsida iti shellfish manipud Bolinao, Anda, naiballaag

PANGASINAN – Binallaagan ti Bureau of Fisheries and Aquatic Resources (BFAR) ti publiko iti saan a panagsida kadagiti shellfish a naggapu iti kabaybayan ti ili a Bolinao ken Anda agsipud ta naduktalan a positiboda iti red tide.

Iti Shellfish Advisory No. 17 a napetsaan ken pinirmaan ni BFAR Undersecretary Eduardo Gongona idi Abril 7, positibo iti red tide dagiti kinolektada a sample ti shellfish iti nadakamat a dua nga ili ket naiballaag kadagiti umili iti dida panagsida kadagitoy.

Kas maibatay iti nasao nga advisory, nangato ti paralytic shellfish toxin level ti samples dagiti shellfish a nakolekta kadagiti nadakamat nga ili.

Imballaag ti BFAR iti publiko iti saanda a panagsida iti tahong ken aramang agsipud ta positibo dagitoy iti red tide.

Kanaig daytoy, dua nga aglaklako ti inreport ti City Information Office ti Dagupan a naaresto agsipud ta nasalamaanda a nagibiahe iti uppat a sako ti tahong iti Magsaysay fish market.

Segun iti report, naipaima iti Waste Management Division ti siudad dagiti nakumpiska a sinako a tahong para iti umisu a disposal dagitoy.

Nupay kasta, kinuna ti BFAR nga awan ti peggad nga agsida iti lames manipud kadagiti nadakamat nga ili no la ketdi presko dagitoy ken mabugguanda a nalaing ken maikkat ti nagunegda kas iti asang ken bagisda sakbayda a maluto.

Kinuna ni Gongona a nainget a monmonitoren ti BFAR ken dagiti lokal a gobierno ti kabaybayan ti dua nga ili tapno masigurado a saan nga agpeggad ti salun-at ti publiko. (Tawid News)

 
Comments are closed.