Footer

SINURSURAN: Iti Pannakaammo Ti Nagtaudanda

Kolum ni Jobert M. Pacnis

(Maudi a paset)

SINURSURAN (2)

Malaksid iti remediation, adda pay dayta masapul nga annongenda a home visitation. No nagsaganad a dua wenno tallo nga aldaw a naglangan ti ubing nga awan pakaammo, masapul a surnadan iti balayda. Kasta met dagiti maal-alimadamaden nga agsardeng ta naumadan wenno saandan a kayat ti sumrek. Agtrabahoda kano laengen iti talon, baybay, karayan ken katataan. Kuartanto met laeng ti sapulenda. Dagiti met dadduma, kaawan ti busbosenda ta rigat latta ti adda a kabibiag ti pamiliada.

Ket ditoy manen a napanunot ti pagadalanda ti mangiskolar iti ubing. Kitaenda dagiti talaga nga awanan (iti tulong dagiti opisial ti barangay) ken pursigido nga ubbing. Tunggal maysa kadakuada a mannursuro, adda iskolarenna nga ubing. Kababaan ti maysa.

Saanna a rigaten daytoy ta paseten ti sinapataanna a trabaho. Kayatna koma idi ti agkitakit ta adda pamiliana ket isu laeng ti namnamaenda. Ngem no malagipna ti ragsak ti makatulong, saannan a kuentaen ti maawan a para koma iti pamiliana.

Iti panag-home visitation-da, naimatanganna ti rupa ti biag dagiti adalanda. Agdammangda iti karayan babaen ti barangay. Kalpasanna, agtraysikeldanto pay laeng a dumanon iti pagadalan a daliasatenda dagiti likkalikkaong a dalan a nangtaraigid met laeng iti karayan.

Baybay iti amianan ken karayan iti abagatan ti nanglikmut kadagiti lima a feeder barangay ti pagadalanda. Ket iti ibibisitada kadagiti kasulinekan nga ubbingda, iti isla a kunkunada, saanna laeng a naimatangan no di ket narikna no kasano ti rigat dagitoy no kasta a sumrekda. Aglalo la ketdi no panagtutudo.

Naammuanna a no malikudanen ti ubing iti barangay/bangka a mangiballasiw kadakuada, awanen ti mabalinanna no di aglangan. Maminsan laeng nga agbiahe ti barangay. Malaksid laeng no adda pribado a barangay a rummuar tapno mapan makidapon wenno adda nasisita a rantaenna idiay plasa.

Iti met pantalan iti puseg ti barangay, manmano met ti agbiahe a traysikel. Ket no nakalikuden dagitoy nga agitulod iti estudiante, awanen ti maluganan.

Gapu ta katataan ti karayan a nanglikmut iti sibubukel a barangay, panagpingot (panagaramid iti nipa) ken panagaramid iti lambanog ti pangalapkapan dagiti agindeg. No panawenna, panagkalap kadagiti rasa, pasayan, ken kaggo. Nabaknang pay ti lugar iti exotic a taraon nga aw-awaganda iti ballasi wenno ayuyo. Iti paset nga asideg iti sabangan, adda panawen nga agadu dagiti rissing (annak ti rasa) ket dagitoy ti kalkalapen dagiti ubbing nga ilako kadagiti agangkat nga aggapu pay iti probinsia ti Pangasinan. Ngem maipariten daytoy ta nadlawanda a bimmassiten ti makalkalapanda a dadakkel a rasa.

Ti nadlawanna pay, manmano ti muyong iti aglawlaw ti pagtaengan dagiti ubbingda. Malaksid ngamin a katataan, nailet ti espasio a pagitukitanda koma iti uray dua kapuon laeng a tabungaw wenno ania man a nateng. Nalubo pay ti aglawlaw no katudona ken nakatangtangken met a pitak no kainitna.

Ngem kenkuana, nalaka laeng koma a solusionan daytoy no kayat a talaga dagiti nagannak. Mabalin nga agaramidda iti pagpatayan dagiti pagmulaanda a sako, nagawangan a botelia wenno plastic, ken uray pay dagiti daanen nga attak (pagala iti rasa) a didan maus-usar. Saan la ketdi a parikut ti pagsibog uray kalgaw ta nabuslon latta ti danum iti karayan a pannakaparaanganda payen no ar-arigen.

Dayta ti narugiannan iti klasena a TLE. Pinamulaanna dagiti sako a naggianan ti taep a dusa dagiti di mangsursurot iti pagalagadan ti eskuela. Kasta metten dagiti nabnabtak, nabutbuttawan a baldi ken lata a pagbasuraan. Kayatna ngamin nga ipamatmat nga uray awan ti umisu a pagmulaan, saan a rason tapno makapagmula naimbag la a nayon a taraon iti inaldaw wenno pangalapkapan no adu ti maapit.

Wen, iti panagbisitana, naawatanna no apay nga aglangan no maminsan dagiti ubbingda. Naawatanna no apay a di mammammigat dagitoy no dadduma. Nayasideg pay ti riknana kadagiti nagannak dagiti ubbingda bayat a kinapatpatangna dagitoy no kasano ti aginaldaw a panagbiagda, no ania dagiti arapaapda, ken pampanunot maipanggep kadagiti isyu iti aglawlaw.

Ken manen, kas idi adda pay laeng iti maysa a pribado a pagadalan idiay ilida, napaneknekanna nga iti sulsulinek, addada didiay ti pudpudno a tao. Napakumbabada, nadayawda, ken awan panaginkukuna ti pannakilangenda. Nariknana la unay dayta uray iti apagbiit laeng a kaaddana kadakuada.

Naikarina iti bagina: ad-adda pay nga ipateg, awatenna ti kasasaad dagiti ubbingda—ubbingda a nakanumnumo iti panagkita dagiti agad-adal iti sentro. Ammona, adda balitok kadakuada a nakalupkopan iti pitak. Masapul laeng ti anus a mangibagnos kadakuada.

Ket impasiguradona iti bagina, kayatna ti agbayag iti disso a nakaipalladawanna. Adda ditoy ti pudpudno a nakaawaganna nga adipen ti tisa.#

Comments are closed.