Footer

3 miembro iti Bolt Cutter Gang, naapput agtakaw iti pawnshop

SAN JUAN, Ilocos Sur – Miembro iti Bolt Cutter Gang, dagiti tallo a lalaki a naapput bayat ti pananggandatda nga agtakaw iti maysa a pawnshop sadiay Barangay Bannuar ditoy nga ili idi parbangon ti Abril 23.

Nabigbig dagiti suspek a da Fred Toldican y Angayen, 31, naasawaan, minero, ken residente iti Barangay Purok 20, San Carlos Heights, Irisan, Baguio City; Nickson Binaliw y Babawen, 27, awanan asawa, construction worker ken residente iti Barangay Mines View, Baguio City; ken Ronald Allan Rivera Jr. y Kitoyan, minero, awanan asawa ken residente iti Irisan Dumpsite, Baguio City.

Temporario a nawayawayaan dagiti suspek kalpasan ti panagpiansa ti tunggal maysa iti P12,000.

Dagus a nagresponde dagiti polis apaman a nakaawatda iti report manipud iti maysa a Richard Guerrero y Rebibes nga agnaed iti asideg ti Tambunting Pawnshop nga adda nangegna nga agkalkali iti nadakamat a pagsaldaan.

Naapput dagiti polis ti dua kadagiti suspek bayat ti panangabutda iti likud a diding ti pawnshop idinto a naipiskotda ti maysa pay a nakastreken iti uneg ti pasdek.

Mapapati a nakadlaw dagiti uppat a kakadua dagiti suspek ket naglibasda.

Nakarekobre dagiti polis iti asideg ti pawnshop ti tallo a bareta, 2 bonete, manual drilling tool, bolt cutter, 3 pliers, 2 hydraulic jack, maysa paris a sinelas, maysa a hand glove, flashlight, ken 2 ragadi.

Nakasukain pay dagiti polis iti maysa a bareta ken manual drill tool iti lugan dagiti suspek a maysa a Toyota Hi Ace van a naammuan idi agangay a nairehistro iti nagan ti maysa a Ruben Ronquillo a taga-MA211 Poguis, La Trinidad, Benguet.

Kinuna dagiti polis a pakaammuanda ni Ronquillo tapno ilawlawagna no kasano nga adda iti ikut dagiti suspek ti luganna.

Grupo dagiti agtaktakaw iti pawnshop ti Bolt Cutter Gang ket nainbolbaren daytoy kadagiti panagtakawan iti pagsaldaan iti kallabes. (Tawid News)

Comments are closed.