Footer

BANNER: 5 balay nasukisok; 3 nagpositibo iti paltog, balbala

STA. CRUZ, Ilocos Sur – Tallo kadagiti lima a tattao a puntiria ti search warrants ti nasukainan nga adda nakalemmeng a paltogda ken balbala iti naggigiddan nga operasion nga inwayat dagiti police elements idi agsapa ti Abril 27.

Nakasamsam ti nagtitipon nga elemento ti CIDG Region 1, Sta Cruz police station, PIB, PIDMB ken PPSC a naggapu amin iti Ilocos Sur Police Provincial Office ken Santiago police station kadagiti paltog ken balbala iti ikut da Aida Javillonar y Fontanilla, Manuel Javillonar y Soliven, ken Orlando Javillonar y Soliven, tallo kadagiti lima a puntiria ti iggemda a search warrants idi inwayatda dagiti panagsukisok.

Nakasamsam dagiti operatiba iti pagtaengan ni Aida Javillonar y Fontanilla iti 14 short magazine assembly para iti M16 rifle; 3 long magazine assembly para iti M16 rifle; 3 rounds live ammo ti M16; 2 rounds live ammo ti 9MM pistol; 61 kapsula ti cal .45; 43 kapsula ti Cal 9MM; stainless magazine holder; 2 bandoleers; ken maysa a nangisit a handbag.

Nakasukain met dagiti polis iti balay ni Manuel Javillonar y Soliven iti maysa nga M14 SN 639814; Cal 9MM Norinco Pistol SN 409963; Cal 22 Rifle (converted); 6 magazine asembly para iti M14; 93 rounds ti bala para M14; magazine assembly para iti 9MM; ken maysa round ti bala ti cal. 22.

Dagiti met sumaganad ti nasukainan dagiti polis ken ni Orlando Javillonar y Soliven: maysa a cal 45 Norinco SN BA 37284-12-246PH12; extended magazine: 17 rounds live ammo ti cal .45; ken kapsula ti cal .45.

Nupay kasta, negatibo iti droga ti resulta ti panagsukisok maikontra kadagiti nadakamat a suspek.

Awan met ti nasukainan a droga wenno paltog iti panagsukisok dagiti polis iti taeng da Freddie Javillonar y Soliven ken Antonio Javillonar y Soliven.

Naiwayat ti panagsukisok kadagiti lima a balay nakurang dua a lawas kalpasan ti pannakaaresto ti maysa a lalaki gapu iti panagpaputokna iti asideg ti arko iti barangayda ken ti panangpaturongna iti paltog iti maysa a kalugaranna.

Maipalagip nga idi Abril 15, inaresto dagiti polis ti maysa nga Alfredo Javonillo y Somera, agnaed iti Barangay Besala, Sta. Cruz, Ilocos Sur gapu iti panagikutna iti cal. 45 pistol a nagkarga iti maysa a bala iti chamber daytoy ken 4 a bala iti magasinna. Sakbay ti pannakaarestona, nagpaputok ni Javonillo iti asideg ti arko iti barangayda ken pinaturonganna iti paltog ni Johnny Ungra, kalugaranna.

Naipaiman ti kaso a frustrated murder ken grave threat maikontra ken ni Javonillo iti opisina ti provincial prosecutor, Candon City. Nakasuan pay ni Javonillo iti illegal discharge of unlicensed firearm iti babaen ti Criminal Case No. 3965-C ken grave threats babaen ti pannakaaramat ti awanan lisensia a paltog babaen ti Criminal Case No. 3966-C iti Regional Trial Court, Candon City ket nairekomenda nga agpiansa iti tig-P40,000.00 tunggal kaso.

Nawayawayaan ni Javonillo iti kustodia ti Sta. Cruz police station kalpasan ti panagpiansana.

Naipan dagiti naaresto agraman dagiti nakumpiska kadakuada iti opisina ti CIDG para iti dokumentasion.

Iti pannakaisurat daytoy, maisagsaganan ti pannakaiyendorso ti kaso iti provincial prosecutor’s office, Candon City. (Tawid News)

Comments are closed.