Footer

Miembro ti grupo nga agtaktakaw iti motorsiklo, naaresto

STA. CATALINA, Ilocos Sur – Maysa a negosiante a mapapati a miembro ti motornapping group ti inaresto dagiti nagtitipon nga elemento ti kapolisan sadiay Barangay Cabuloan, ditoy nga ili idi malem ti Abril 25.

Inaresto dagiti elemento ti CIDG Ilocos Sur, ISPIB, ISPPSC, HPG ken Sta. Catalina police station ni Odysee Abril Mantilla y Reutotar, 30, naasawaan ken residente iti nadakamat a barangay babaen ti bileg ti warrant of arrest nga inyisio ni Judge Corpuz B. Alzate ti RTC Branch 21, Vigan City.

Nakasaklang iti kaso a carnapping iti nadakamat a korte a naipababaen iti Criminal Case No. 8184-V, nairekomenda ni Mantilla nga agpiansa iti P180,000.00 para iti temporario a wayawayana.

Segun iti polis, kameng ni Mantilla iti Samboy Motornapping Group (saan a nakalista) ken nakalista a drug personality ti Sta. Catalina.

Naikustodia ni Mantilla iti CIDG para iti dokumentasion sakbay ti pannakaipaimana iti maseknan a korte.#

Comments are closed.