Footer

SINURSURAN: Leddaang iti Barukongna

Kolum ni Jobert M. Pacnis

(Maudi a paset)

Pudno nga adda dayta mass promotion a bilin manipud kadagiti nangatngato ngem kadakuada. Daytoy ti pagsamsammakedan dagiti dadduma a pagadalan a mangipasa lattan kadagiti annak nupay saan koma a mabalin. Ta saanda a kayat ti agsungbat iti ngato no apay a di maipromot iti sumaruno nga agpang ti ubing.

Ken pagsamsammakedan dagiti dadduma nga ubbing ken nagannak.

Ngem kas nakunanan, ken pagtaktakderanna, saan nga umanamong kadaytoy a pammilin. No di maikari ti ubing a mapan iti sumaruno nga agpang, apay koma a palubosan? Di naal-alaston no matakuatan nga awan ammona uray agbasa laeng koma wenno agkuenta? Di isunto ti pabasolen ti sumaruno a titserna?

Ket, wen, dagiti ubbing a mabati iti agpang a ‘yanda ti mangukrit la unay ti leddaang iti pusona. Tagisayangenna ti makatawen dagitoy . Pagaammona unay no kasano ti rigat ti panagbiag iti nakaipuruakanna. Panagkalap (iti karayan), panagaramid ti lambanog ken panagpingot ti kangrunaan a pagbiagan. Panagtalon kadagiti dadduma.

Iti pannakabagsak dagiti dadduma nga ubbing, saanda a di makarikna iti leddaang. Impakatda aminen a pamuspusan tapno makakamakam laeng dagitoy: home visitation, remedial classes, panangted iti pagplete no dadduma (ta aglangan dagitoy no awan ti mairemedio dagiti nagannakda), ken panangiskolar kadakuada.

Ngem saan a kimna dagitoy kadagiti dadduma. Aglanganda uray awan gapgapuna. Ag-cutting classes-da. Makibarkadada kadagiti taga-ruar a mangisungsong kadakuada iti dakes nga aramid: arak ken sigarilio—ken kadaksan, addan report kadakuada, ti panangpadas nga agsusop iti maiparit nga agas.

Sakbay ti moving up ceremony, napaayaban dagiti nagannak dagiti ubbing a maysa ken dua ti gradoda. Kinapatang ida ti prinsipal. Malaksid iti remedial class nga impakat ti pagadalan kalpasan ti tunggal grading period, tapno nalaka laeng a makakamakamto dagiti ubbing iti udina, mai-remedial pay dagiti ubbing kalpasan ti moving up.

Ngem bassit a nagannak ti timmabuno iti miting nga intuyang ti prinsipalda. Kadagiti adda a nagannak, nailawlawag kadakuada no apay nga ar-aramiden ti pagadalan ti remedial. Narigat no mabagsak dagiti annak iti tallo a subject ta automatic no kuan a retained— nupay adda dayta mass promotion a kunkunada. Bagsak, agsubli iti agpang a yan ti ubing. No dua laeng ti nakabagsakanna, mabalin a maipromot ngem subliannanto dagita a subjects. Ngem tapno awanton ti subsublianna, isu a maipakaten ti remedial.

Napagpirma dagiti nagannak iti kasuratan a sipapalubosda kadagiti annakda nga ag-remedial iti uneg ti makalawas kalpasan ti moving up. Ket no saan a makumpleto dagiti ubbing ti makalawas ta yun-unada ti agbakasion, saandanto koma a pabpabasolen ti pagadalan no saan a maremedioan ti/dagiti bagsakda.

Ti ammona, awanen ti mabagsak nga ubbingda gapu kadayta nga addang (ken panagsakripisio iti biangda). Ngem adu latta ti di nangidaddadaneng nupay naulit ti pannakaibaga dayta a programa idi manarimaanen ti moving up. No asino pay dagiti nagannak a masapul nga agparang tapno mabagaanda iti sasaaden dagiti nagannakda, isuda pay ti awan. Isuda pay dagiti nagintatangken a nagkuna a pumasanto latta dagiti annakda.

Ket kas ninamnamada, adda sumagmamano nga ubbingda a masapul a mabati iti agpang a yanda. Isuda dagiti addaan iti tallo ken ad-adu pay a suheto a nakabagsakanda. Isuda dagiti nagsamsammaked lattan iti ammoda a mass promotion, isuda dagiti natangsit, isuda dagiti addaan iti di mangipangpangag a nagannak.

Ita, ti pay leddaangenda nga agkakabaddungalan, ti panagirakurak dagiti natangsit a nagannak nga awan kano ti asida. Nagadun ti masaoda iti pagadalan. Idi kano adda iti sabali a pagadalan ti anakda, adda kano pay honors-na. Apay nga itan ta sumsumrek (ti ammoda, ta saanda met a mapan iti pagadalan no mapaayabanda) ken adda met utek ti anakda, isu pay ti pannakabagsakna.

Wen, ammona unay, adu dagiti nagannak a kakastoy. Ngem sitatalinaedda a natibker. Saanda a padupir kadagiti dina ammo ti lawlawatenna.

Ket ti leddaang iti barukongna, ta masayangan la unay kadagiti ubbing, agbalin latta a pagsarminganna iti panangipatungpalna a naim-imbag ti sinapataanna. Saan a daytoy ti mangadipen kenkuana a mangtubay kadagiti ubbing. Itultuloyna ketdi latta a pabaruen ti istratehiana tapno iti masanguanan, saanton a tinawen a maukrit dayta a leddaang iti barukongna.#

Comments are closed.