Footer

BANNER: Hog dealer, natiliwan nga agipuslit 12 oversized a baboy iti Tagudin

TAGUDIN, Ilocos Sur – Tiniliw dagiti personnel ti Provincial Animal Quarantine ditoy probinsia ti drayber ti Isuzu Elf truck kalpasan a nasukalan a nalimed a nagidiskarga kadagiti baboy ditoy nga ili idi parbangon ti Mayo 3.

Nabigbig ti drayber ti Isuzu Elf a maysa a Cesar Sipian Sacnit, 34, naasawaan, hog dealer, ken residente iti Barangan Man-atong, Suyo, Ilocos Sur.

Dagus a nagresponde dagiti polis idi nakaawatda iti tawag ti selpon manipud ken ni Martel Plana Quitoriana, hepe ti nasao a quarantine, idi agarup 3:20 ti parbangon ti Mayo 3 a nagpatulong gapu iti suspetsa a maipuslit a maidiskarga iti Barangay Libtong dagiti oversized a baboy a karga ti maysa nga Isuzu Elf idinto a maideliber dagitoy iti Abatan, Mountain Province.

Sakbayna, nakaawat ni Plana iti impormasion mainaig iti nasao a truck nga aggapu iti Suyo a nagkarga kadagiti baboy a maidiskarga iti Barangay Libtong.

Pinasardeng da Plana ti truck iti quarantine sada sinukimat dagiti dokumento nga iggem ti drayber ngem napalubosan met laeng daytoy nga agbiahe gapu ta nailanad a maidiskarga dagiti baboy iti Abatan.

Gapu ta nagsuspetsa ni Plana, nalimed a sinurotna ti truck ngem nakitana a simmiasi daytoy iti dalan ket simrek iti Libtong.

Dagus a nagpatulong ni Plana iti police station ket kinuyogna dagiti polis agraman dagiti personnel ti 2nd Maneuver Company ISPPSC a nakabase iti Sta. Lucia, Ilocos Sur a nagturong iti Barangay Libtong.

Naduktalan dagiti otoridad nga innem laengen a baboy ti karga ti Isuzu Elf ket naidiskargan dagiti sabali pay nga innem ken naipupokdan iti kulongan.

Inaresto dagiti polis ni Sacnit sada impan ti lugan ken dagiti baboy iti police station ditoy nga ili para iti umisu a disposision.

Iti maysa nga interbiona iti lokal a telebision itay nabiit, iannugot ni Joey Warren Bragado, provincial veterinarian, nga agkurkurang ti produksion ti baboy iti probinsia.

Kapaliiwan ti panagkirang dagiti maparti a baboy nangruna iti Vigan sipud pay idi nabutosan a maysa kadagiti pito a pagsiddaawan a siudad iti lubong gapu iti yaadu dagiti turista nga agpaspasiar iti siudad.

Maipalagip a tapno masalbar ti hog industry iti probinsia, nangted ni dati a Governor Luis “Chavit” Singson iti sag-P1.5 million a tulong kadagiti hog traders ken agtartaraken iti baboy ken dagiti agparparti iti baboy.

Ngem kapaliiwan latta iti napalabas nga adda dagiti natiliw a naglabsing iti Provincial Ordinance No. 15-06 gapu iti panagipuslitda iti oversized a baboy iti probinsia gapu iti panagkurkurang dagiti maparti a baboy a mailako iti tiendaan. (Tawid News)

Comments are closed.