Footer

Kotse, simmapgid iti traysikel, 8 nadundunor

TAGUDIN, Ilocos Sur – Walo a tattao a pakaibilangan dagiti dua a drayber ti nadun-dunor ken naiyospital gapu iti panangsapgid ti maysa a kotse iti maysa a traysikel iti national highway ti Barangay Borono, ditoy nga ili iti agsapa ti Mayo 3.

Naitaray para iti pannaka-agasda iti Ilocos Sur District Hospital, Barangay Bio, Tagudin ti drayber ti traysikel a ni Jonel Hortizuela y Cuello, 35, residente iti Barangay Pattiqui, Sta. Cruz, Ilocos Sur agraman dagiti pasaherona a pakaibilangan da Cristina Pagaduan y Somera, 41, Sherika Javillonar y Salanguste, 19, estudiante agpada a residente iti Barangay Borono, Tagudin, Ilocos Sur; Erlinda Gabatino y Bukiran, 66, naasawaan ken residente iti Brgy. Pattiqui, Sta Cruz Ilocos Sur; ken Jocelyn Dulay y Nerona, 42, tindera, ken resi-dente iti Barangay Casilagan, Sta. Cruz.

Naipatsek-ap met iti nasao nga ospital da Francis Alfaro y Amayao, 35, naasawaan, mangisursuro, nagmaneho iti Mitsubishi Mirage Sedan ken residente iti #42 Caloocan City, National Capital Region; ken dagiti pasaherona a da Ailyn Barcelon y Pascual, 30, awanan asawa, maestra ken ti anak daytoy a ni Althea Barcelon Strada, nga agpada a residente Brgy. Sta Cruz, Dasmarinas, Cavite City.

Nakaro ti dadael ti makinsango a pilid ti traysikel idinto nakuppil ti sungo ti Mitsubishi.

Iti panagimbestiga dagiti polis, agpaamianan a direksion ti kotse ket idi makadanon iti nakapasamakan ti aksidente, mapapati nga inobertekan ni Alfaro ti maysa a di nailasin a behikulo ket nasapgidna ti traysikel iti abagatanen nga abaga ti kalsada a nakadunoran dagiti naglugan.#

Comments are closed.