Footer

Pammaltog, napasamak iti Aldaw ti Trabaho

STA. LUCIA, Ilocos Sur – Nupay awan ti panggedan dagitoy agkalugaran, sinelebraranda latta babaen ti panaginumda ti Mayo 1, Aldaw ti Trabaho. Yan ti dakesna, gapu ta addada iti babaen ti inpluensia ti arak, naparnuay ti panagsubangda a nagtungpal iti pannakapaltog ti maysa a puon ti nakatayanna.

Naideklara nga awanen ti biag ni Gian Dela Cruz y Acosta, 23, awanan asawa, residente iti Barangay Buliclic, Sta. Lucia, Ilocos Sur idi maidanon iti Sta. Lucia District Hospital gapu kadagiti sinagrapna a sugat iti ulo, teltel, ken likudna gapu iti panangpaltog kenkuana ni Mario Cabbab y Baldomar, 44, naasawaan, kalugaranna met laeng.

Kas maibatay iti report, bayat ti ilalabas ni Dela Cruz iti sango ti balay ni Cabbab, mapapati a binugkawan ti suspek kadagiti dakes a balikas a namkuatan ti biktima a nangkumpronta iti kalugaranna.

Agpada da Dela Cruz ken Cabbab a nakainum idi nagsubangda.

Mapapati a bayat ti panagsubangda, innala ni Cabbab ti improvised a cal. 22 a riplena ket pinaltoganna ni Dela Cruz iti sumagmamano a beses malaksid laeng ti panangimalona ti putan ti paltog iti ulo ti biktima.

Naglibas ti suspek iti saan nga ammo a direksion kalpasan ti pammaltog.

Iti panagimbestiga ti SOCO team, Candon City, nakarekobreda iti uppat a kapsula para iti cal. 22, bolo, ken ti nadadael a putan ti paltog iti crime scene.

Boluntario nga insuko ti maysa a Fred Zapata kadagiti polis ti barrel ti cal. 22 rifle a mapapati nga imbati ti suspek.

Iti pannakaisurat daytoy, mabirbirok pay laeng ni Cabbab. (Tawid News)

Comments are closed.