Footer

Nagdinnungpar a motorsiklo, drayber nakainumda: polis-Sta. Lucia

STA. LUCIA, Ilocos Sur – Agpada a nakainom dagiti drayber dagiti motorsiklo a nainbolbar iti aksidente idi rabii ti Mayo 9, segun iti pakauna a report ti polis ditoy nga ili.

Iti inisial a panagimbestiga dagiti polis, agpada a nakainom da Michael Rivera y Villanueva, 27, baro, residente iti Brgy Cabaritan, Santa Lucia, Ilocos ken ni Rodrigo Valdez y Banay, 27, baro, residente iti Barangay Baracbac, Galimuyod, Ilocos Sur idi mainbolbarda iti aksidente idi agarup 11:30 ti rabii ti nadakamat a petsa a nakaigapuan ti pannakasugsugatda..

Agpadaya a direksion ti Honda TMX a minaneho ni Rivera idinto nga agpalaud met ti Honda Wave a minaneho ni Valdez idi nagdinnungpar dagiti motorsikloda iti national highway a sakup ti Barangay Conconig East iti dayta a rabii.

Intaray dagiti personnel ti MDRRMC, Sta. Lucia Rescue team dagiti biktima iti Candon City Hospital ngem imballakad ti doktor sadiay a maiyalis ni Valdez iti ospital iti La Union gapu iti grabe a sugatna.

Pimmusay ni Valdez bayat ti kaaddana iti dalan ket indeklara ti attending physician nga awanen ti biag daytoy idi maidanon iti Bacnotan General Hospital.

Kuna ti polis a malaksid a nakainum dagiti nagmaneho, awan pay ti helmetda idi mapasamak ti aksidente.

Kabayatanna, lima a tattao ti naiyospital idi sinapgid ti maysa a kurong-kurong a minaneho ti maysa a kagawad ti kasabatna a motorsiklo iti provincial road ti Barangay Poblacion, Sto. Domingo idi malem ti Mayo 8.

Naipaagas iti Northside Doctor’s Hospital, Guimod, Bantay, Ilocos Sur da Rotzen Tubon y Tadena, 29, awanan asawa, mekaniko, ken dagiti insakayna a da Italia Rosenny Tubon y Tadena, 26, balasang, OFW, ken Sandy Tubon y Tabutol, 3, both residenteda amin iti Brgy Flora, Sto. Domingo, Ilocos Sur idinto a naitaray iti Tolentino Clinic and Hospital, Sto. Domingo da Brgy. Councilor Arnel Pio y Pacleb, 33, married, ken residente iti Brgy Alangan, Magsingal, Ilocos Sur ken Evelyn Resonable Ramos tapno mataming dagiti dunorda.

Kas maibatay iti inbestigasion, linisian ni Pio a nagmaneho iti Honda TMX 155 tricycle (kurong-kurong) ti muntuon ti daga iti dalanenna ket mapapati a kimmaut iti linia ti kasabatna nga Sniper 150 a minaneho ni Tubon a puon ti nakasapgidanna iti motorsiklo.

Segun pay iti report, malaksid nga awan ti plate number ti Sniper 150, awan pay ti lisensia ni Tubon nga agmaneho. (Tawid News)