Footer

2 natiliw iti drug operation ti polis-Candon, Vigan City

VIGAN CITY – Kabarbaro a drug personality ken maysa a tricycle driver ti natiliw iti nagsina nga operasion ti kapolisan sadiay Candon City ken ditoy a siudad idi malem ti Mayo 9.

Inaresto dagiti nagtitipon nga elemento ti Vigan CPS, PDEA ISSET 1 ken ISPDEU ni Oscar Masamoc Francisco, 31, awanan asawa, residente iti No. 215 Saint Rita Street, Brgy 186, Lower, Brgy Maricaban, Pasay City ngem agdama nga aggigian iti Brgy Capangpangan, Vigan City, Ilocos Sur kalpasan a nakumpiska iti ikutna ti dua a plastic sachet a naglaon iti mapapati a shabu bayat iti impakatda a buy bust operation idi agarup 9:56 ti rabii.

Segun iti polis, kabarbaro a masipsiputan a drug personality ni Masamoc.

Malaksid iti droga, nakasamsam pay dagiti polis iti P2,140.00 a mapapati a nagtaud iti naglakuan ti suspek iti droga.

Naipan ni Masamoc iti Vigan City police station para iti dokumentasion ken drug test examination idinto a naipatulod iti Provincial Crime Laboratory Office, Bulag, Bantay, Ilocos Sur dagiti nakumpiska kenkuana a droga ken kuarta,

Kabayatanna, natiliw idi agarup 5:40 ti malem iti daytoy met la nga aldaw ni Jonathan Casiño y Vicente, 30, naasawaan, ken residente iti Barangay Bagani Campo, Candon City bayat ti akto a panagaramatna iti masuspetsa a marihuana iti Candon City Arcade, Barangay San Jose.

Karaman kadagiti nasamsam dagiti polis iti ikut ni Casiño ti maysa a naluktan a plastic sachet a naglaon iti mapapati a bulong ti marihuana ken improvised smoking pipe a nagkarga iti mapapati a marihuana.

Nakalista ni Casiño iti watchlist ti kapolisan ditoy a drug personality nga agus-usar iti marihuana ken shabu.

Segun iti polis, boluntario idi a simmuko ni Casiño idi Septiembre 19, 2016 iti babaen ti Oplan Tokhang Operation Double Barrel ngem sinublianna man met laengen ti bisiona iti droga. (Tawid News)

 
No comments yet.

Leave a Reply