Footer

2 ubbing nalmes bayat panagdidigosda iti karayan

SUGPON, Ilocos Sur – Nagtungpal a naliday ti panagpipiknik dagiti agkakabagian kalpasan a dua nga ubbing a kameng ti pamiliada ti nalmes bayat ti panagdidigosda iti karayan idi bigat ti Mayo 1.

Saanen a naidanon iti ospital a sibibiag da Althea Mabitasan y del Rosario, 11, residente iti Brgy. Marcos, Rosario, La Union ken Jhaziel Benito y Orpiano, 8, residente iti #17 Marigold Purok 2, San Luis Village Baguio City.

Segun iti report, napan nagpipiknik dagiti biktima, kaduada dagiti nagannak ken kakabagianda iti Amburayan River sadiay Sitio Calipayan, Barangay Pangotan, ditoy nga ili idi nadakamat a petsa.

Bayat ti panagdidigosda iti karayan, binallaagan dagiti nataengan dagiti ubbing a saanda a mapan aglalangoy iti adalem a paset ti karayan ngem mapapati a saan a tinungpal dagiti biktima a nagtungpal iti pannakalmesda.

Nasarakan dagiti nalmes idi agarup 1:30 ti malem iti dayta met la a petsa ket naitarayda iti Tagudin General Hospital Capillaris Center Tagudin, Ilocos Sur ngem naideklara nga awanen ti biag dagiti biktima.#

Comments are closed.