Footer

Agkabsat, pinaltogan sabali pay a kabsatda

SAN ILDEFONSO, Ilocos Sur – Pinaltogan ti maysa a lalaki dagiti kabsatna gapu iti pannakakitana a pinanggep ti maysa a dangran ti anakna ken iti baet a pinanggep ti sabali a pagtalnaen ida.

Iti report a dimmanon iti police station ditoy nga ili, napasamak ti panangpaltog ni Antonio Bersamina Jr. y Abejon, aka Olok, 50, iti kabsatna a ni Alex Bersamina y Abejon, 45, iti mismo a sango ti balay ni Barangay Captain Carmencita Tumbaga idi agsapa ti Mayo 16.

Intaray dagiti nagresponde a polis ti biktima iti Northside Doctors’ Hospital iti Barangay Guimod, Bantay, Ilocos Sur para iti pannakaagasna.

Iti inisial a panagimbestiga dagiti polis, agdigos koma ni Marvin Bersamina y Marilag, 28, baro, anak ti suspek, idi dinarup ti ulitegna a ni Antonio ket pinanggep daytoy a pang-oren ngem nakataray ni Marvin.

Mapapati a nakapungtot ni Antonio idi lumabas iti balay ni Barangay Captain Tumbaga ta nakitana ti panangdarup ti kabsatna a ni Alex ken ni Marvin ket inasutna ti paltogna sana pinaltogan ti kabsatna a akatamaan iti bukot ken makannigid a sikona.

Pinaltogan pay ni Antonio ti sabali a kabsatda a ni Gregorio idi pinanggep daytoy ti aganawa. Nupay kasta, saan a napuntaan ni Gregorio.

Nakarekobre dagiti polis iti maysa nga slug a mapapati a nagtaud iti cal. 38 iti crime scene.

Naglibas ti suspek ngem nakemmeg met laeng daytoy iti pursuit operation nga inwayat dagiti polis.

Idi nakemmeg dagiti polis ti suspek, nakasamsamda iti ikut daytoy iti sabali a paltog, maysa a cal. 22 revolver.

Boluntario nga insuko ti maysa a Santos Bolo y Vinlayo, 37, lumugar met laeng iti nadakamat a barangay, ken ni Barangay Captain Tumbaga ti paltog a mapapati nga imbati kenkuana ni Antonio a maysa a cal. 38 revolver a nagmarka iti Taurus Int. Mfg. Miami, Florida, USA a nagkarga iti 12 a bala, 19 a bala ti cal. 22, dua a bala ken dua a kapsula ti cal. 38 a naikarga iti chamber daytoy.

Agtultuloy ti panagimbestiga ti polis mainaig iti nasao a pammaltog. (Tawid News)