Footer

SINURSURAN: Ti Kayaw Dagiti Bantay


Kolum ni Jobert M. Pacnis

Umuna a paset

MAKAALIAW ngem napnuan kayaw!

Dayta ti pangiladawanna iti padasna a dinanto malipatan.

Malem ti Huebes (Abril 20), manipud iti ilina a Ballesteros, idi agrubuat nga agpasiudad ti Tuguegarao a dua oras ti biahe. Maturog dita ta patangan ti grupoda a sapaenda ti agdaliasat iti kabigatanna. Iti Google map, mapan a nasurok a siam nga oras ti biaheda iti destinasionda.

As-asideg, kunada. Ta no manglikawda pay laeng iti Ilokos, mabalin a maibayagda ket didanton maabotan ti rugi ti programa a dar-ayanda.

Saan ngata a delikado ti dalan? nasaludsod idi mitingda sakbay ti nasao a biaheda.

Saan. Sementado aminen, naipasigurado. Ken tapno mapadasantayo met ti magna iti sabali ta saan laeng a puro Ilokos.

Aglawagen iti kabigatanna, agarup alas singko, idi agaludaid ti grupoda. Lima ti luganda nga Innova ken Montero.

Awan arimekmek ti tunggal maysa idi damo. Kasda laeng agpipinnaliiw. Ngem idi sumrekdan iti probinsia ti Kalinga, mangrugin a mabtak ti ulimek iti nagbabaetanda.

Daytoy ti kunkuna ni sir a kayumanggi a bantay, kinuna ti maestra a kaduada. Pitoda amin iti Innova a nakailugananna agraman drayber ken maysa nga ubing. Pito agingga’t walo met ti linaon dagiti kakomboyda.

Kinitana ti aglawlaw. Mangrugin a dayasan ti leggak dagiti bantay iti aglawlaw. Nupay agdadamona a labsan dagitoy, ammonan no apay a naawagan iti kayumanggi a bantay ti adda iti aglawlawda.

Ruot, daga ken batbato laeng ti makita kadagiti bantay. Ibakalna man iti adayo ti imatangna, kaskasdi ti makitana. Siguradona lattan a tedda daytoy dagidi nangrames iti nakaparsuaan.

Ket ita ta kabarbaraan ti damag iti saan a pannakapasingked ti posision ni Madam Gina Lopez iti DENR, mapampanunotna nga ad-adu pay ti marames a paset ti Ina-a-Daga. No ania la unayen ti adda kadagiti kameng ti Commission on Appointment ta dida man laeng pinanunot ti nakaparsuaan. No asino pay ti adda ngipenna a mangipakat iti linteg, isu pay ti mapadisi a kasla awan aniamanna.

Money lobby talks, kuna ni Lopez iti napasamak kenkuana.

Iti panagtultuloy ti panagdaliasat ti grupoda, nakaawatda iti text manipud iti asawa ti drayber ti Montero a pannakaliderda. Impalagip daytoy ti panagannad ti drayberda iti masungadda a barangay.

Tributribo ti tao ditoy, impalawag ti drayberda. Narigat ti makapalidpid uray manok wenno aso. Pabayadanda agingga iti anak ti anak ti anak ti anak…

Kasanon no tao ti nadisgrasia? nasaludsodna.

Pasayagem nga isubli ti luganmo, sir, naisungbat. No idiretsom, sigurado nga abotendaka ta awan unay ti sumiasiam a dalan. Delikadoka no kuan…

Nariknana, bimmangon ti buteng iti barukongna.

Ngem naayat dagiti tao ditoy, nakuna ti maysa a kaduada. Saanmo la ketdi ida nga agrabiadoen.

Ket napaneknekanna dayta idi agdamagda iti umisu a dalan idi addan masungadda nga agsanga a pagnaan. Nadayawda. Sipapakumbabada a mangisuro iti dalan.

Iti panagtuloy ti biaheda, in-inut a napukaw ti butengna. Nagdaeg ti nakaparsuaan a malablabsanda.

Iti ikakalipkip ti luganda kadagiti kabambantayan, nadlawanna a saanen a kas iti nalabsanda. Nakalanglangto ti aglawlaw. Natatayag dagiti kayo iti agsumbangir a sikiganda. Adda pay kanito nga umusok ti luganda iti sirok dagiti bato a bantay a kunam la no magmagnada iti gukayab idinto a derraas iti makanigidda.

Maysanmaysa ti nagala iti ladawan kadagiti kaduana. Lumanitak dagiti balonda a selpon. Saan a nagpaudi. Dayta ti damo (ken dina ammo no masunotanto pay) nga idadaliasatna dita a deppaar. Inruarna ngarud ti digicam-na ket “siniripna” dagiti malabsanda. Saan pay a napnek, innalana ti selponna ket inusarna pay daytoy aglalo ket nabayag ti reaction time ti digicam-na.

Nalapunos ti ragsak ti sibubukel a kinataona. Nagdaeg ti aglawlaw— manipud kadagiti agkakangato a bantay, dadakkel a kayo iti bakras, karayan a naglilitnaw ti agay-ayus a danumna nga ammona lattan a nagtaud iti tuktok ta adu dagiti babassit a dissuor a nalabsanda.

Idinto a ngumatngato ni Apo Init, saanda a marikna ti dagaang (nupay kangitingitan ti kalgaw). Saan a gapu ta air conditioned ti luganda no di ket iti pariir nga ipugpug-aw ti nakaparsuaan kadakuada.

Naariwawada no makasirayda kadagiti napuskol nga angep ken ulep iti asidegda. Awan ti paudi a mangala iti ladawan.

Gawgaw-atentayon ti langit, adda nagkuna kadakuada.

Saan, adda met mangyangaw. Adda laeng dakkel a kapre nga agtabtabako dita babaet dagiti higante a bantay.

Ket mammamsek ti luganda iti katkatawa.

Agalas otson iti agsapa idi un-unorenda ti paset ti Lubuagan ken Tinglayan, Kalinga. Nakalabasda pay iti naipinta nga ikkis iti bakrang ti bantay: No to dam!

Ket nalagipna ti nabasana idi a nobela ni Ric Agnes, nobelista ken agdama ita a kolumnista ti Bannawag, a maipapan iti pannakaipatakder ti Ambuklao Dam. Nalabit, kas kadagiti agbibiag iti nasao a nobela, amken dagiti agindeg ti peligro a yeg ti pannakaipatakder ti dam iti lugarda.

(Adda tuloyna)

Comments are closed.