Footer

BANNER: Signature campaign kontra namirit-iti biddut a libro Ilokano, nairusat

LAOAG CITY, Nangirusat ti gunglo dagiti mannurat nga Ilokano ditoy probinsia iti signature campaign para iti pannakapasubli amin a libro nga Ilokano a maaramat kas material iti Mother Tongue-Based Multilingual Education (MTB-MLE) program.

Iti petisionda a naipatulod ken ni DepEd Secretary Leonor Briones, kinuna dagiti mannurat nga awan anag dagiti libro ken napno iti biddut iti grammar. Inladawanda pay dagiti nadakamat a libro a “masaksakit”.

Kinuna pay ti petision a saan a garantiaan dagiti libro a maikkan dagfiti ubbing nga Ilokano kadagiti kasapulanda a paglaingan, tagimpen, sursuro, ken dadduma pay, a kasapulanda iti ilalaktawda iti nangatngato a grado ken makapagsaganada iti kas kapaut ti biag a sirib.

Kinuna ni Joel B. Manuel, maysa a prinsipal ken premiado a mannurat iti Ilokano,  a kasapulan ti saan a nakurkurang a 5,000 a pirma sakbay a maipatulod ti kopia ti petision iti opisina ti DepEd iti Manila.

Indagadag met ni Dr. Aurelio S. Agcaoili, coordinator ti Ilokano program sadiay University of Hawaii, Manoa ken autor dagiti libro nga Ilokano a pakairamanan ti diksionario Ilokano ken thesaurus,  kadagiti mannurat nga Ilokano ti panagpirmada iti petision ken iti pannakipartisiparda iti kampania para iti masakbayan dagiti ubbing nga Ilokano.

Binasnotan dagiti mannurat  ken dadaulo dagiti nadumaduma a gunglo ti Ilokano ti panagraira dagiti napno iti biddut iti ortographia ken gramatika a libro a maaramat a kas material iti pannakaiyimplementar iti K-12 program iti sapasap a pagilian, nangruna dagiti libro iti pre-school ken Grades 1 to 3.

Maysa kadagitoy namirit iti biddut a libro ti sinurat ti maysa a Jhony C. Azada ken inedit ti maysa a Maria S. Eliza, agpada a mangisursuro iti Ilocos Norte.

Segun  ken ni Manuel, kiniddaw ni Ilocos Norte Schools Division Superintendent Araceli Pastor ti  komentona mainaig iti nadakamat a libnro sakbay ti pannakaipublikarna.

Kinunana nga imbatadna a napno ti manuskrito kadagiti biddut iti grammar ken  ortograpia ngem dina ammo nga idi nakiddaw ti komentona, madama gayamen  a maim-imprenta ti libro.

Indagadag dagiti petisioner ken ni Sekretario Briones a malaksid ti panangpaisublina amin dagiti namirit iti biddut nga Ilokano a libro, paimbentariona pay amin a libro ti MTB-MLE a naisurat iti Ilokano ken maar-aramat a kanayonan a material iti pannakaisuro iti Ilokano.#

 

 

 

Comments are closed.