Footer

DINARDARAAN

Sarita ni Dexter Fabito Marin

Maudi iti dua a paset

 

 

Nagsubli ti panagubingna iti panunotna iti nanumo a balayda. Nagdiding ken nagatep iti bulong ti labig ken apagisu laeng kadakuada nga innem, isuna, ni adingna ken ni manangna, sa dagiti dadakkelda, ti maymaysa a kuarto a nagdatar iti tabla. Balay a rimmuaranda nga agkakabsat tapno birokenda met ti gasatda iti sabali a disso. Nanumo ngem adda ayat a nangbalbalkot kadakuada a sangapamilia iti inaldaw nupay gagangay a sida iti away ti ipapaunegda. Itan ta maysan a mannursuro, a kayatnan  ti mangbukel iti bukodna a pamilia, kayatna met a nanumo ti patakderenna a pagtaengan. Ken kayatna a suroten dagiti addang ken pannaripato kadakuada dagiti daddakkelda.

“Sumrekka, bhe,” timek ni Ester iti uneg.

Talaga a pagpampanunotennak, a, nakuna ni Sabas iti unegna. Masansan ngamin a dina maawatan dagiti dadduma a mapaspasamak ken kapanunotan ti kaayan-ayatna. Kas man itayen a dina immay binugaw dagiti aso. Sa ita, apagbingngi laeng ti lukat ti ridaw.

Inan-anat nga inlukib ni Sabas ti rikep ti ridaw. Inin-inayadna nga inserrek ti ulona. Nagkidem iti apagapaman. Addayta manen ti nagpaiduma a rikna, naidumduma. Insanudna ti ulona. Inbagkatna bassit ti rikep ta narigat nga ilukat. Inan-anatna manen nga inserrek ti ulona. Naisangasangayan daytoy a kapadasak, nakunana iti unegna.

Nangegna ti ikkis ni Ester. Kinagat ngata ti kuton wenno lamok? Wenno gapu iti basbasaenna? Simmalput iti uneg ni Sabas. Iyatrasna koma manen ti ulona ngem naladawen idi madingkal ti ulona ti nakasab-it a kaldero. Nadigos ti ulona iti dara. Nagsinnabat dagiti matada. Nagpaut iti apagapaman. Nagdumog ni Ester. Simmirip dagiti ngipenna idi iyangadna ti rupana gapu iti naiparsiak a dara iti pus-ongna. Kasla maymaysa ti linaon ti panunotda. Ngem no kautem a nalaing ti utek ni Sabas ket adda naidumduma a ragsak a mabirokam. Sumalput dayta iti pusona. Agasem!

“Allaka,” kinuna ni Ester. Saan a mailemmeng ti rupanget iti rupana ngem di met makaunget. Indissona ti basbasaenna sa siaalisto a nagturong iti ayan ni Sabas. “Naibellengen dayta usarek koma a pangdinardaraan.”

“Diak inggagara,” insungbat ni Sabas. “Siak pay lang ti simrek ditoy, aya.”

“Obvious kadi?” awanen ti mirduot iti rupa ti balasang. “No saan a sika ti immuna ket awan koman dayta a natuknom dita asideg ti ridaw. Nadalapus koma diay immuna nga immay.”

“Wen met ketdi, a.” insungbat ni Sabas.

“Nairanta a dita ti pagisab-itak nupay ammok a madalapus ti asinoman a sumrek.”

“Addayta manen ti diak maawatan kenka, bhe,” kinita ni Sabas ti balasang. “Siakon ti mangpidut iti naibelleng ken siakon ti mangdalus iti basar. Basolko isu a siak ti masapul a mangikkat.” Rimmuar  tapno wagsitanna ti ulona.

Umis-isem ni Ester a nangisurot iti panagkitana iti pangalbuen ken nadaraan nga ulo ti kaayan-ayatna sa nagturong iti kusina.

Nakaidda manen ni Ester iti katre a naaramid iti way idi agsubli ni Sabas iti uneg. Sabalin ti suotna a short ken tisirt. Agbasbasa manen. Kastana ngata nga agbasa kinuna ni Sabas iti unegna ta mangmangegna ngamin a kasla agar-areng-eng ti kaayan-ayatna. Wenno nakabutbuteng ngata ti basbasaenna, sinaludsod ti bangir a panunotna. Immanges iti nauneg. Innalana ti bassit a kaserola a nagyanan ti dinardaraan sa inpisokna dagiti naiwara iti basar.

Rimmuar manen ni Sabas. Idi agsubli, addan iggemna a tabo a naglaon iti danum. Nagsabat dagiti matada ken Ester idi agsubli iti uneg ti balay. Gapgapu ni Ester iti kusina. Adda iggemna a sangabaso a danum.

“Makain-inumkansan ta horror sa met ti binasam, bhe,” kinunana.

“Wen, ngarud. An-anuem ta danum?”

“Pangugasko a, ken ‘diay nakaibellengan ti dara.”

“Ha ha. Urayka  la agkaling-etanen, bhe. Ne, itiponmo payen daytoy teddak nga imminum.”

“Kunam met ket dimo makita ta ling-et dita mugingmo. No agbasakanto pay la ngamin iti nakabutbuteng.”

“Damok ti agbasa iti kasdiay. Pinadasko ngarud.” Nakatugaw a nakasikig ni Ester a mangbuybuya iti kaayan-ayatna a mangug-ugas iti kayo a datar.

Kinita ni Sabas ni Ester idi malpasna ti obrana. “Ahhh,” kinunana. “Urayak la nabang-aran ta nalpaskon ti obrak.”

“Uray siak, nabang-aranak met ta nalpaskon a binasa ti basbasaek itay,” insungbat ni Ester.

Naggiddanda a timmakder idinto nga agkinkinnitada. Iniggaman ni Sabas ti ima ni Ester idi iyawatna ti tabo. Saan pay a naukas ti panagpinnerrengda. Addayta manen ti kasla pannakaitayok ni Sabas. Ad-adda met a limmanay dagiti mata ni Ester. In-inut a naginnasideg dagiti rupada. Inrikus ni Sabas ti kanawan a takiagna iti siket ni Ester. Insadag met ti balasang dagiti dua a takiagna ken Sabas.

“Umayakto manen ditoy. Diakto mauma, bhe.” kinuna ni Sabas.

“Agsublikanto latta ta kukuam metten daytoy a balay ta ikutmo metten daytoy pusok.”

“Agsublikanto. Ngem sapay ta dinto manen mairana a dinardaraan ti sida a lutuek. Ta uray no kasano ti ayatmo a mangan ket di met mabalin ta dimo met kayat ti dinardaraan.”

“Wen, agsubliakto, bhe. Ita pay ta nastrekkon daytoy balaymo.” Insungbat ni Sabas. “Ikuyogkonton dagiti dadakkelko.”

“Dayta ti nasken,” pinerreng ni Ester. “Iyam-ammokanto met kada uliteg ken ikitko. Dayta dakkel a balay ti balayda.”

“Kunak man,” immisem ni Sabas. “Aglutotanto iti dinakdakan tapno adda mayonnaise-na.”

“Torta a tarong,” inyisem ni Ester.

Pinidil manen ni Sabas ti pingping ti kaayan-ayatna. Agkankanta ti kaungganna.

Naginnisemda a dua. Agkatkatawa ti uneg ni Sabas iti pannakalagipna iti pannakadara ti ulona.#

Comments are closed.