Footer

Nangitaray iti motorsiklo, mabirbirok

VIGAN CITY – Nabigbigen ti nangitaray iti motorsiklo ti maysa a security guard ti maysa a kompania ti bus ditoy siudad idi rabii ti Mayo 19.

Nainaganan ti suspek a maysa a Melody Malaqui a.k.a. “Lloyd”, residente iti Barangay 6, Sarrat, Ilocos Norte, saan Batac City, kas intedna nga adres iti guardia a nangsubla-tanna iti motorsiklo a dinan insubli.

Nupay mabirbirok pay ti suspek, naipaiman iti opisina ti city prosecutor ti kaso a panaglabsing iti RA 6539 kas inamendar ti RA 10883 maikontra kenkuana.

Kas maibatay iti pulong ni Procopio Javier Paet, 56, security guard ti Dominion Bus Terminal, ken residente iti Paing, Bantay, Ilocos Sur, idi agarup 9:30 ti rabii ti Mayo 19, inasitgan ni Malaqui ket nagpakpakaasi a sublatenna ti motorsiklo gapu ta adda emer-hensia a papananna.

Impasublat ni Javier ti luganna kalpasan nga inkari ti suspek nga isublina met laeng a dagus.

Naam-ammo ni Javier ti suspek a nagpammarang a taga-Batac, Ilocos Norte gapu ta maysa a mountain bike ti insalda daytoy kenkuana idi napalabas a lawas.

Segun iti biktima, manipud idi impasublatna ti motorsiklo, saanen a nagparang ti suspek ken saanen a naisubli pay ti motorsiklona.

Idi saannan a makontak ti suspek, nagpulongen ni Javier iti polis.

Nangipatulod dagiti polis iti flash alarm kadagiti kabangi-bangna a police stations ngem iti pannakaisurat daytoy, at large pay laeng ti suspek. (Tawid News)