Footer

OPISIAL A PROTEKTOR TI ABU SAYYAF

Komentario ni Eden A. Alviar

 

“MAKIKAKAIDDA isuna iti kabusor.” Dayta ti nabatad nga inrakurak ni Philippine National Police Chief Director General Ronald De la Rosa nga inaramid ni Supt. Maria Cristina Nobleza, kalpasan a natiliw ti babai nga opisial ti PNP a kaduana ti bomb maker a terorista a kameng ti Abu Sayyaf Group.

Natiliw dagiti kameng ti PNP sadiay Clarin, Bohol ni Supt. Nobleza. Kadua ti polis ni Rinierlo Dongon ken ti baket nga inana ken ubing a kaanakanna. Natiliwda gapu iti panangtarayda iti checkpoint kabayatan ti dragnet operations tapno makemmeg dagiti ASG a dimmayo sadiay Bohol tapno agkidnapda kadagiti turista sakbay ti pannakaangay ti Association of South East Asian Nation summit iti Pilipinas.

Maibasar iti report, sinaed dagiti polis ti pick-up a nagluganan da Nobleza ngem imbes a nagsardengda ket tinarayanda dagiti nangpara kadakuada a gapu ti nangkamatan kadakuada dagiti kameng ti PNP agingga a naipasulida. Iti imbestigasion, naduktalan a ni Nobleza ket opisial ti PNP ken agdama a Deputy Regional Director ti PNP Crime Laboratory sadiay Davao Region.

Nagrason ni Nobleza a madama nga agbakbakasion isuna iti Bohol. Nagpakada isuna a napan iti comfort room tapno umisbo ngem napanna laeng imbelleng ti SIM card ti cellphone-na. Ngem nabirokan dagiti polis ti SIM card a nakatakuatanda kadagiti naka-record a text message ni Alias Saad, lider dagiti Abu Sayyaf a simmanglad sadiay Inabanga, Bohol nga agpapa-rescue gapu ta nasugatan ken agpeggad a matiliw kalpasan ti nadara a pannakirangetda kadagiti kameng ti Armed Forces of the Philippines. Naduktalan pay iti imbestigasion ti kinatao ni Dongon ken dagiti kaduada a natiliw iti lugan.

Kadagiti sumarsaruno nga aldaw, in-inut ti panaglawag ti kaso ni Nobleza ken ti relasionda ken ni Dongon a terorista ken kameng ti ASG a natiliw a suspek ti panagbomba idi 2013. Maibilang met a beterana iti Intelligence work ni Nobleza a sigud a nagpaay iti Presidential Anti-Organized Crime Commission idi panawen ni Presidente Benigno Aquino III. Ni Nobleza ti nagimbestigar ken ni Dongon idi matiliw ti suspek a terorista a nagam-ammuan ken mapapati a nangrugian ti relasionda.

Naduktalan pay a ni Nobleza ket sigud a nayasawa iti maysa met laeng nga opisial ti PNP a kameng ti Class 1991 PNP Academy ken agpapaay a Police Attache sadiay Pakistan. Naammuan a nawaswasen ti kasarda iti padana nga opisial, ken nagkallaysada iti Muslim rite ken ni Dongon babaen ti panangkasar kadakuada iti daydi Malaysian a terorista a ni Zulkipli Bin Hir alias Marwan a maysa a religious leader.

Ni Marwan ti wanted a terorista a napapatay dagiti kameng ti PNP Special Action Force kabayatan ti Operation Exodus sadiay Mamasapano, Maguindanao iti Pebrero 25, 2015 a nakatayan dagiti 44 a SAF commandos.

Impalgak ni De la Rosa a bayat ti panagsaritada ken ni Nobleza iti detention cell sadiay Camp Crame ket adu dagiti impormasion a naammuanna. Imbaga ni Nobleza nga adda isuna iti undercover operations kas Deep Penetration Agent a nakirelasion iti terorista tapno mastrekda ti ASG. Ngem impalgak ni De la Rosa nga awan ti covert operations plan wenno dokumento a mangipaneknek a ni Nobleza ket DPA ti gobierno. Inrakurak ti PNP Chief a maipawil nga ayat ti relasion ti police official ken ti terrorist leader.

Adu a Pilipino ti naiturong dagiti atensionda iti kaso ni Nobleza kas kameng ti PNP a sigud a siaasawa iti padana a police officer ken nakirelasion iti maysa a terorista. Kasla dagiti best-seller a nobela maipapan iti ayat ken panagespia ti pakabuklan ti relasionda. Agpayso ngata a DPA ni Nobleza wenno talaga a natnagen ti riknana ken ni Dongon ket maysan isuna a protector dagiti terorista? No agpayso a nabayagen a nawaswas ti kasar wenno nagsinadan iti PNP official nga asawana, apay nga ar-aramatenna pay laeng ti apeliedo ti sigud a misterna?

Nasken ti nainget a pannakaimbestigar ti kaso da Nobleza ken Dongon tapno maduktalan dagiti nauneg a pagteng iti likud ti ASG. Ipaneknek dagiti pakauna nga imbestigasion ti nalawa a koneksion ti pamilia ni Dongon, ken ti naindaklan a pakainaiganda kadagiti terorista. Kasapulan met ti panagtignay dagiti counter-intelligence operatives ti gobierno tapno maduktalan ken madusa dagiti kameng ti PNP wenno AFP a mabalin a kakumploten dagiti bandido.

Agparparang a maysa kadagiti kabsat ni Dongon ket nagbalin nga asawa daydi Abdurajak Janjalani, founding leader ti ASG. Kalpasan a natay ni Abdurajak, inasawa met ti adingna a ni Khadafy Janjalani, simmublat a lider ti ASG. Idi matay ni Khadafy, inasawa met ni Marwan. Maysa pay a kabsat ni Dongon ket nayasawa ken ni Ahmad Santos alias Abu Solaiman, lider ti terorismo a grupo nga Abu Solaiman Movement.

Nabayagen a nadagsen a parikut ti ASG manipud iti daydi umuna a panangisayangkatda ti nadangkok a terorismo sadiay Ipil, Zamboanga Sibugay idi Abril 3, 1995 a nakatayan dagiti nasurok a 50 a tattao. Immuna idin a naduktalan ti koneksion ti ASG iti international terrorist group nga Al Qaeda idi sibibiag pay ni Osama Bin Laden, ket itan, naitimpuyogen ti ASG iti narungsot a terrorist group nga Islamic State of Iraq and Syria. Nabigbigen ti Ispilon Hapilon, komander ti ASG kas emir wenno kangatuan a lider ti ISIS iti South East Asia.

Adun dagiti naisayangkat ti ASG a terorismo kas ti panagputol ti ulo ken pammapatay, panagbomba, kidnaping, panagrames ken dadduma pay a nakaam-ames a krimen. Adun a biag dagiti soldado ken polis ken inosente a sibilian dagiti naibuis gapu kadagitoy a bandido a grupo a mangbalballikug iti panursuro ti Islam tapno agisaknapda iti buteng kadagiti Pilipino ken ganggannaet.

Iti laksid dagiti adu a nainget a kampania dagiti naglabas nga administrasion kontra ti ASG ket napaayda a nangpaksiat kadakuada gapu iti mapapati nga adda dagiti opisial ti gobierno a mangmangted ti proteksion gapu ta mabingbingayanda kadagiti adu a ransom money a makolkolekta dagiti bandido. Ita ta panawen ni Presidente Rodrigo Duterte, sabali manen nga operasion ken ultimatum ti inyetnag ti AFP ken PNP a mangpaksiat kadagiti terorista. Sapay koma ta agballigida a mangparmek kadagitoy a bandido tapno magibusanen dagiti mapaspasamak a terorismo iti pagilian.#

Comments are closed.