Footer

BANNER: Baro, pinaltogan ti polis, DOA iti ospital

TAGUDIN, Ilocos Sur – Maysa a baro ti nagudas iti pammaltog a mapapati a nagramut iti panagriri ti dua a grupo bayat ti panaginomda iti selebrasion ti piesta ti Barangay Libtong idi parbangon ti Mayo 10.

Naideklara nga awanen ti biag idi naidanon iti Ilocos Sur District Hospital, Barangay Bio, Tagudin ni Jake Olpindo y Somera, 30, baro, ken residente iti Barangay Libtong, Tagudin, gapu iti panangpaltog kenkuana ti maysa a PO1 Marvin Lorena y Valdez, 35, naasawaan, nakadestino iti Bauang police station, La Union.

Segun iti report, napasamak ti pammaltog idi alas 12:18 ti parbangon ti Mayo 10 a mapapati a nagramut iti saan a panagkikinnaawatan ti dua a grupo kabayatan ti drinking session iti selebrasion ti piesta ti nadakamat a barangay.

Kas maibatay iti journal, aggiinom ti grupo da Kazer Lazo ken Fidel Ramos idi adda naparnuay a di panagkinnaawatan iti nagbaetanda.

Nupay kasta, dimmawat ni Lazo iti pammakawan ken ni Ramos ket nagalamanoda sada nagsubli a nagginom iti bukodda a lamisaaan.

Madamdama, simmangpet ni PO1 Lorena nga agimbestigar ket immasideg iti grupo ni Kazer Lazo sana dinisnog ti ulo ti maysa a Justin Ian Lorena.

Saan a nailanad iti journal no apay a dinisnog ti suspek ni Justin Ian Lorena.

Segun iti report, napasamak ti panagubor manipud iti saan nga ammo a direksion a nangpabara iti situasion.

Mapapati a dinangran ni Jessi Fajardo, kadua ti polis, ni Arjel Doctolero ket idi napan tulongan ni Edmund Doctolero a nakaiggem iti kayo ti anakna nga Arjel, dinanog ti suspek idinto a pinadas ni Leizel Mae Somera y Lorena a pagtalnaen da Justin Ian Lorena ken Jay Patrick Lorena.

Tallo ti nangeg a nagsasaruno a kanalbuong ket nakita laengen ni Olpindo a daradara ti badona a kimmamang iti tienda ni Myra Doctolero sa naglusdoy iti daga.

Intaray da Michael Somera, Leonard Somera ken Edmund Doctolero ti biktima iti Ilocos Sur District Hospital ngem indeklara ti doktor a dead on arrival.

Iti panagproseso ti SOCO, Candon City iti crime scene, nakarekobreda iti maysa a nangisit a kallugong ken nangisit a selpon.

Boluntario a simmuko ti suspek iti Tagudin police station agraman ti Glock 17 a paltogna nga addaan 12 a bala a nakakarga iti magasinna.

Kalpasan a naipaagas ti suspek, naikustodia iti Tagudin police station para iti umisu a disposision.

Agtultuloy ti panagimbestiga ti polis mainaig iti nasao a pammaltog. (Tawid News)

Comments are closed.