Footer

Dagiti Aggayyem a Kuton

Sarita Para Ubbing ni Jobert M. Pacnis

(Tuloyna)

Tubngaren ti rikna ni Karrakarra ti plano ti gayyemna. Ngem awan ti maaramidanna. Kayatna ti agpulong iti Ari. Ngem amkenna a guraen ni Bakiki.

Ketdi, binagbagaanna ti gayyemna— kada oras. Dina ngamin kayat a daytoy ket maiderraas. Bareng maalana pay iti nasayaat a wagas.

Ket ni Bakiki, nagbalbaliw a namimpinsan. Nagaramid iti bukodna nga agamang. Mabunagna a taraon ditoy nga ipempempennan. Bassit-usit laengen ti idandanonna iti pagarian.

Saan laeng a dayta. Takawanna payen ti pamilia a pagbumbunaganda. Libasenna dagiti adda iti pagbagasan, kaldero wenno kaserola. Uray pay dagiti masaramsam a kas ti liningta a kamotit, balanghoy wenno saba. Pati kendi ken tinapay kadagiti tiendaan, masikkarudna.

Nupay kasta, di a nangliwat ni Karrakarra. Binagbagaanna latta ti gayyemna.

Isardengmo daytan, gayyem,” sangkakunana ken ni Bakiki. “Kas nasaok idin, maysa dayta a kinatiri. Aramidmo, singirennakanto la ketdi. “

Ti la masasaom!” makasuron ni Bakiki. “Agulimekka latta kadin dita suli!”

Gayyem, ling-et ken dara ti namataudanda kadagita al-alaem…”

Durgi! Kaska la kalaingan a padi!”

Ngem limed kadagiti aggayyem, ammo gayam ni Ari Abuos ti amin.

Ngem napateg iti ari dagiti soldadona. Inikkanna ni Bakiki a makaamiris iti aramidna. Iti maysa a malem, kinasaritana.

Bakiki,” kinunana, “madmadlawko ket bumasbassiten ti taraon a yeyegmo ditoy pagarian. Adda kadi problema? Sawem koma tapno matulonganka.”

Narigat ngaminen ti panagbiag dagiti tao, Napateg nga Ari,” di man la nagkintayeg a kinuna ni Bakiki.

Kasta kadi?” imperreng ti Ari kenkuana. Tuktukoden daytoy ti kinataona.

Wen, Ari a pagraeman. Kinapudnona, adun kadakuada ti lumanglangan a mangan!”

Nagtungtung-ed ti Ari. Maysa, Bakiki…

Ngem adda naidanon kaniak, Bakiki,” intuloy ti Ari. “Rikiar ti pamilia a pappapananyo, permi. Apay kadi?”

Awan daydiay, madaydayaw. Kinagatko la ngamin ti anakda ta naloko unay. Kasano, mapanna ketdin gaburan iti daga, taraon a bunagenmi ken ni Karrakarra.”

Dua, nakuna ni Ari Abuos iti nakemna. Ulbodka metten, napateg a soldado, aya!

Maudi unay, Bakiki,” kinuna ni Ari Abuos. “Adda naduktalan dagiti padam a soldado nga agamang a napnapno iti taraon. Kukuam kadi daydiay? Maysa a badom ti nakitada sadiay.”

Ne, saanko a kukua daydiay nga agamang, Napateg nga Ari,” inlibak latta ni Bakiki. “Adda mapukpukaw a pagan-anayko, ‘tay kaki. Isu siguro ti nakita dagiti padak a soldado. Idi pay napan a lawas a sapsapulek, dayta ti pudno. Wenno amangan ta adda nangplano? Napateg nga Ari, wen, tinakawda ti pagan-anayko. Impanda iti inaramidda nga agamang tapno apaman a maduktalam, agbalinak a dakes iti imatangmo. Ket maikkatak a soldado. Ta umap-apal kadakami ken ni Karrakarra, ay, adu!”

Tallo, intanamitim ti Ari. “Kasta kadi? Sige, mapanka ngaruden, Bakiki…”

Makais-isem ni Bakiki a nagturong iti kuartoda ken ni Karrakarra. Agur-uroken ti gayyemna. Nabannog la unay a nagobra. Ay, ni Ari Abuos, namaysaanna!

Naiturog ni Bakiki ti ragsakna. Ngem idi makariing, nagbalaw ta sabalin ti langana. Guddua laengen iti dati a kinabassitna. Immuring payen ti bagina. Ken nagbukel a kas lengnga.

Linidlidna dagiti matana. Ngem iti sarming isu latta nga isu ti makitkitana.

Dayta ti gunggonam, Bakiki!” natibong ken nalawag a timek ti nagallongogan. Timek ni Ari Abuos a madaydayaw. “Dayta ti maal-alam. Ulbodka ken mananggundaway!”

Nagtigerger ni Bakiki. Kasano a naduktalan ti Ari?

Manipud ita, ikkatenkan a soldadok. Diak kayat ti kas kenka a manniblok. Nayon a pannusam, agbalinka laengen a kuto. Wen, kuto nga agnaed iti ulo dagiti tao. Dayta la agkutkot iti darada ti pagbiagmo. Ngem natuok dayta a kasasaadmo. Aglemlemmengkanto lattan. Ta baka sikat’ masukainan. Lig-isendaka a di masasaan!”

Saannn!!!” inyikkis ni Bakiki. “Pakawanennak, Napateg nga Ari! Sipupudnon ti innak panagserbi!” Ngem saanen nga impangag ti Ari.

Ket kadayta met la a kanito, ni Bakiki nagbalinen a kuto. A masarakan itan kadagiti ulo ti tattao.#

Comments are closed.