Footer

Dagiti Aggayyem a Kuton

Sarita Para Ubbing ni Jobert M. Pacnis

IDI un-unana a panawen, adda dua a kuton nga aggayyem, da Bakiki ken Karrakarra. Best friend-da. Agnaed dagitoy iti abut iti puon ti narukbos a mangga. Ditoy, naragsak ti panagsarsaritada no awan trabahoda.

Soldado ti pagarian dagiti kuton nga iturayan ni Ari Abuos da Bakiki ken Karrakarra. Atiddog dagiti saka ni Karrakarra ken dakkel ti bagina. Ni met Bakiki, naparaburan iti babassit ken napipino a saka. Pimmanait ti bagina. Guddua laeng no idilig ken ni Karrakarra. Ngem ti kinabassitna, us-usarenna no adda inda karupak. Nalaka laeng ngamin nga aglemmeng a manglib-at.

Kas napudno nga aggayyem, ti sakit ti maysa, sakitda a dua. Kanayon nga agkuykuyogda.

Iti pagarian, adu ti umap-apal kada Bakiki ken Karrakarra. Nagagetda nga agpadpada. Ni Ari Abuos, awan ti makunana. Isuda ti kaaduan ti maisangsangpet a taraon no kua! Kanayon a daydayawen ti ari ida.

Maysa nga agsapa, nagrubbuat manen dagiti aggayyem tapno annongenda ti trabahoda. Masapul nga adu ti mayawidda a taraon aglalo ket dandani manen agpasngay ti reyna.

Nagsaruno a rimmuar dagiti aggayyem iti kuartoda. Immuna ni Bakiki, simmaruno ni Karrakarra. Tunggal masabatda a kuton, kainnungoda. Pangkablaawda daytoy iti tunggal maysa.

Tinalantan dagiti aggayyem ti dalanda a mapan iti pagalaanda ti taraon. Pagtaengan daytoy ti maysa a mannalon. Adu ti taraon a maal-alada. Ta adda latta met iwarsi kadakuada ti kameng ti pamilia. Saandan a masapul ti mangilibas iti pagbagasan wenno kadagiti tedtedda.

Nakasangon iti dulang ti pamilia a nadanonda. Natan-awan dagiti aggayyem ti tinuno a dalag ken liningta nga igat a masida. Urayda la a napasanapsap, napanganga. Umas-asuk met innapuy a milagrosa.

Umaykayon dakayo a di-makitkita,” kinuna ti ama ti pamilia. Insawangna daytoy kalpasan a nakapagkararagda. “Ramananyo daytoy naisagana.” Nangkiddis iti masida. Nangpirit iti innapuy sana indisso iti suli.

Napaisem da Bakiki ken Karrakarra. Di pay laeng nalipatan dagiti tao ti inuugma a pammatida. Sabagay, agpayso man met nga adu ti di-makitkita. Iti aglawlaw, addada laeng dita.

Saan a dagus nga innala dagiti aggayyem ti naidisso a taraon. Pinagbayagda bassit tapno dida makabkabasol. Narigaten no bibigda ti agkabbibaw. Pagpiestaanto la ket ida dagiti managuyaw.

Agin-innawen ti ina ti pamilia idi in-inut nga arudoken dagiti aggayyem ti bunagenda a taraon. Ngem saggaysada laeng ti imbaklay nga innapuy. Dose amin dagitoy. Subliandanto dagiti dadduma a naurnong.

Nagpanunot ni Bakiki. No dua laeng ti mabagkatda nga aggayyem iti tunggal biahe, ammona ngaruden no mamin-anoda nga agsublisubli. Siguradona, didanto pay mabannog. Ta saksakada ti naandur. Ken inayon payen ti lasag ti lames a bunagenda. Mamindua met ngata a daytoy sublianda.

Kasta a kasta ti galad dagiti agpagayam. Dida marikna ti bannog basta para iti pagarian. Ta nupay kaskasano, dida met makurkurangan. Taraon, abunaw iti lamisaan. Di kayat ni Ari Abuos a dagiti soldadonat’ mabisinan.

Ngem iti maysa nga aldaw, kellaat nga adda napanunot ni Bakiki. Inyumanna iti gayyemna a nasudi.

Gayyem, adda ibagak kenka,” kinunana. “Ngem daytoy, a, ket para laeng kadata.”

Ania dayta, gayyem?” magagaran ni Karakara a nagdamag. Intugawna pay iti iddana a papag.

Nabayagen a panawen nga agserserbita iti pagarian,” intungtung-ed ni Bakiki. “Rumbeng laeng nga alaenta ti talaga a katukad ti bannogta,” inna indusngi.

Aniat’ kayatmo a sawen, gayyem? Inka man lawlawagen…” nakudkod ni Karrakarra ti ulona. Uray la nagbullabullad dagiti matana.

Imbaga ni Bakiki ti planona. Ket di mamati ni Karrakarra iti nangngegna.

Alla, gayyem, madi dayta!” intubngarna. “Pananggundaway ti kasta.”

Pagbambannoganta met, gayyem,” impilit latta ni Bakiki. Kinilladanna ti iduldulinna a dulsi.

Uray pay!” impetteng ni Karrakarra. “No maammuan ti ari, dakeska.”

Siak latta ngaruden, gayyem, no madika. Ngem, ne, awan ti agipulpulong, a?”

(Adda tuloyna)

Comments are closed.