Footer

Debosion ken ni Santo Cristo Milagroso

Salaysay ni Eden A. Alviar

MAYSA kadagiti kangrunaan a narelihiosuan a piesta iti Amianan a Luzon nangruna iti Arkidiosesis ti Nueva Segovia (Ilocos Sur) ket ti Piesta ni Santo Cristo Milagroso a tinawen a maramrambakan.

Nangayed a ramrambakan dagiti deboto ni Santo Cristo Milagroso wenno Apo Lakay ti piestana sadiay Sinait, Ilocos Sur ken Vigan City. Reprep dagiti deboto a dumardar-ay kadagiti agsasaruno a misa iti agmalem sadiay sanktuario ni Santo Cristo Milagroso wenno simbaan ti Parokia ni San Nicolas de Tolentino iti Sinait. Kasta met ti kaadu dagiti dumardar-ay kadagiti agsasaruno a misa iti Simbaan a Bassit iti abay ti kamposanto iti sentro ti Vigan City.

Manipud parbangon, agmalmalem a pila dagiti umapros iti pagattao a nangisit nga imahe ni Santo Cristo a nailansa iti krus iti likudan ti altar iti simbaan iti Sinait. Aggapu dagiti deboto manipud kadagiti nagduduma a lugar iti Ilocandia ken probinsia iti Amianan a Luzon. Adu met dagiti pilgrims ken turista a naggapu kadagiti adayo a lugar iti Pilipinas ken iti ballasiw-taaw.

Ti imahe ni Santo Cristo Milagroso kaduana ti imahe ni La Virgen Maria Milagrosa ket nagdaliasat iti taaw ken naidaknirda a naikahon iti igid ti baybay sadiay Sitio Logo, Dadalaquiten (Norte itan), iti nagbedngan ti Sinait ken Paguetpet, Badoc (Ilocos Norte) idi Tawen 1620. Naggapu dagitoy nga imahe manipud sadiay Nagasaki, Japan. Mapapati nga impayanud ida dagiti misionero a Katoliko idi panawen ti pannakaidadanes ken pannakaikuskuspil dagiti Kristiano kabayatan ti Tokugawa Regime. Iti dayta a panawen, naidadanes dagiti Katoliko sadiay Japan ken nadadael wenno napuoran dagiti nakristianuan nga imahe.

Dagiti dua nga imahe ket nasarakan dagiti mangngalap a naikahon iti dayta a lugar. Ti imahe ti nangisit a Santo Cristo ket innala dagiti agindeg iti Sinait, ken imbalayda iti pannakasimbaanda. Innala met dagiti taga-Badoc ti imahe ni Virgen Maria Milagrosa.

Maibasar iti sarsarita idi un-unana, nagpakarigat a nangbagkat dagiti taga-Sinait ti imahe ni La Virgen Milagrosa, kasta met a narigatan dagiti taga-Badoc a nangawit iti imahe ni Santo Cristo Milagroso. Ngem linaklakada nga inawit idi nagsinnukat ti bagkaten dagiti agindeg kadagiti dua nga ili. Dayta ti immuna a naibilang a milagro dagiti dua nga imahe a nagdidinnamagan dagiti tattao.

Nagraira iti Ylocos (awag iti sigud a maymaysa a probinsia) ti milagro ti imahe ni Santo Cristo ket immadu dagiti deboto kenkuana. Adu dagiti napan nagkarkararag iti nakaibalayan ti imahe ni Santo Cristo iti Sinait tapno agdawatda iti kaasi ti Dios. Adu dagiti naipadamag a naagasan dagiti nakaro a sakitda ken napatgan dagiti kiddawda babaen ti napasnek a panagkararag ken panagdebosionda ken ni Santo Cristo.

Idi Tawen 1756 ken 1882, nagsagrap ti peste dagiti agindeg iti Vigan ket binulodda ti imahe ni Santo Cristo Milagroso. Babaen ti nobena ken napasnek a panagkararag ken debosion dagiti mamati iti Vigan ket naagasanda kadagiti sakitda, ken naisalakanda iti peste. Gapu iti dayta a pasamak, nagtultuloy ti napasnek a debosion dagiti taga-Vigan ken ni Santo Cristo Milagroso, ken ad-adda pay a nagsaknap ti damag ti milagro.

Gapu iti umad-adu a deboto ken ni Santo Cristo Milagroso ken dagiti nagdaydayaw iti imahe a nagkiddaw kadagiti bukodda nga intension, rinugian dagiti mamati ti nagbangon ti permanente a nakaibalayan ti imahe. Nagpaut iti walo a tawen a dagiti taga-Sinait ket binangonda ti simbaan a nakaibalayan ti imahe ni Santo Cristo Milagroso babaen ti panangpondo ken panangbayabay dagiti Kastila.

Kadagiti naglabas a siglo ken dekada, immadu pay dagiti deboto ken ni Santo Cristo iti Sinait. Reprep dagiti makimkimisa iti simbaan iti tunggal umuna a Biernes iti tunggal bulan. Arigna saan nga agpulsot ti pila dagiti mapan umagek ken umapros iti imahe ni Santo Cristo nangruna iti Semana Santa, aglalo iti Biernes Santo, ken tunggal piestana iti kada Tres de Mayo.

Maibilangen ti imahe ni Santo Cristo a gameng ti Arkidiosesis ti Nueva Segovia. Tapno masaluadan ti pannakataginayon ti imahe, naikahonen daytoy iti maanninaw a napuskol a sarming, ken maaprosan laengen dagiti saka ni Apo Jesus Nazareno a nailansa iti krus. Naimuntaren dagiti Closed Circuit Television Camera iti nagduduma a lugar, ken nadutokan met dagiti agbantay a volunteer security forces iti aglawlaw iti simbaan ken iti ayan ti atiddog a pila dagiti deboto tapno masaluadan ti urnos, kappia ken talna iti aglawlaw.

Ad-adda pay nga immadu dagiti deboto ken ni Santo Cristo Milagroso kalpasan ti 2015 – 2016 a rinambakan ti Simbaan Katolika iti Lubong ti Tawen ti Kaasi kas sagudayen ti bilin ni Papa Francisco, gapu ta indeklarar ni Arsobispo Marlo M. Peralta ti Nueva Segovia, ti simbaan ni Santo Cristo Milagroso iti Parokia ni San Nicolas iti Sinait a maysa kadagiti pilgrimage churches iti arkidiosesis a papanan pagkararagan dagiti mamati tapno magun-odda ti Plenaria Indulhensia wenno pannakapakawan dagiti basolda no bulonanda daytoy ti agiwayat ti Aramid ti Kaasi ken ikompesarda dagiti basolda.

Iti kaudian a pannakarambak ti Piesta ni Santo Cristo Milagroso idi Mayo 3, 2017, nagsaruno nga indauluan ni Arsobispo Peralta dagiti dua a Misa Concelebrada sadiay Simbaan a Bassit iti Vigan City, ken iti simbaan sadiay Sinait. Nakikaysa kadagiti nagdudma a Nasantuan a Misa, da Rev. Fr. Lovell Soller, Kura Paroko iti Sinait, ken Msgr. Vicente Avila, Kura Paroko iti Vigan, dagiti adu a papadi ken mamati a laygo a naggapu iti nagduduma a lugar.

Iti homilia ni Arsobispo Peralta, impaganetgetna nga agtultuloy ti panagsaknap ti debosion ken ni Santo Cristo Milagroso gapu ta dagiti mamati ket marikna ken mapadasanda ti ayat ken kaasi ni Apo Jessucristo iti panagbiagda ta napatgan dagiti kararag ken kiddawda iti Dios. Indariragna ti agtultuloy koma a panagdebosion dagiti mamati ken ni Santo Cristo babaen ti panangiyanninawda iti panagbiagda ti panangsurotda kadagiti bilin ken pagayatan ti Dios.

Impasagepsep ti Arsobispo kadagiti mamati a saan koma a bumdeng dagiti tattao nga agtaklin ken ni Santo Cristo kadagiti kasapulanda. Indariragna a saan koma nga agamak dagiti tattao a dumawat iti asi ken pammakawan ni Apo Jesucristo kadagiti nagbasolanda ta ni Apo Dios ket manangaasi, ken awan ti basol a saan a mapakawan ti Dios no la ketdi napudno ti panagbabawi ken panagbalbaliw ti tao.

Iti kaudian a Piesta ni Santo Cristo Milagroso, impakita dagiti adu a deboto iti panagrukbabda kenkuana babaen ti misa, panagkararag ken panagapros iti imahena. Sapay koma ta ipangagda ti kiddaw ni Arsobispo Peralta nga ibiagda ti debosionda babaen ti panangtungpalda kadagiti bilin ken pagayatan ni Apo Jesucristo.#

Comments are closed.