Footer

EDITORIAL: Karit iti Baro a DENR Secretary

MAIBAKLAY ngata a nasayaat ti kabarbaro a nadutokan a sekretario ti Department of Environment and Natural Resources dagiti akemna a mangsaluad ti aglawlaw ken nakaparsuaan ?

Nadagsen a karit ken ni retirado a Heneral Roy A. Cimatu, tubo ti Ilocos Norte, ti panangdutok kenkuana ni Presidente Rodrigo Duterte kasukat ni Regina Paz Lopez a pinagkedkedan ti Commission on Appointment ti pannakadutokna.

Nadutokan ni Cimatu kas DENR Secretary sumagmamano nga aldaw kalpasan ti kontrobersia a panangibasura ti CA iti appointment ni Lopez. Adda dagiti environmental groups a mamagkomkomperar kada Cimatu ken Lopez iti kabaelan ken padasda a mangaywan iti nakaparsuaan.

Naapointaran ni Cimatu a mangidaulo ti DENR iti panawen a kontrobersial ti ahensia ken ti CA iti isyu ti industria ti panagminas iti pagilian ta adu dagiti nabileg a tattao ti nangkontra iti interim appointment ni Lopez nangruna dagiti kameng ti Chamber Of Mining in the Philippines ken dagiti nabileg a politiko ken negosiante nga adda dakkel nga interesna iti industria ti panagminas. Napabara ti kontrobersia ta inrakurak ti Presidente a naaramat ti kuarta iti pannakaibasura ti appointment ni Lopez.

Iti laksid dagiti protesta dagiti makisimpatia ken ni Lopez ken awag dagiti grupo a mangkidkiddaw ti pannakare-appoint-na kas DENR Secretary ket dinutokan ti Presidente ni Cimatu a mangidaulo iti departamento ta namnamaenna nga isu ti mangpaannayas ti pannakaisayangkat dagiti adu nga akem ken trabaho iti ahensia – saan laeng nga iti panagminas – ngem ti pannakasaluad ti angin, danum, bantay, kabakiran ken ti intero nga aglawlaw ken nakaparsuaan.

Natubayen ni Cimatu iti adal ken padas kas lider ken nagserserbi iti gobierno. Nagpaay iti Armed Forces of the Philippines iti las-ud ti 37 a tawen manipud idi nagturpos a kadete sadiay Philippine Military Academy aginggana a nagretiro a Chief of Staff ti AFP idi panawen ni Presidente Gloria Macapagal Arroyo idi 2002.

Kalpasan ti panagretiro ni Cimatu iti AFP, nadutokan a Middle East Crisis Manager idi immandar ni Arroyo ti pannakaipaing iti natalged a lugar dagiti adu a mangmangged a Pilipino sadiay Iraq idi dandanin rauten dagiti puersa ti Estados Unidos. Nagbalin pay a Presidential Special Envoy to the Middle East Preparedness Committee, aginnggana iti umuna a tawen iti termino ni Presidente Benigno Aquino III idi Hunio 2011. Idi Oktobre 11, 2016, dinutokan isuna ni Duterte a kas Special Envoy of the President to the Middle East.

Natenneben ni Cimatu iti serbisio-publiko nangruna iti military ken seguridad, ngem ibilang dagiti dadduma nga umili nga agdadamo pay laeng iti panangsaluad iti aglawlaw ken nakaparsuaan. Saan a kas ken ni Lopez a nabayagen nga agserserbi iti pribado a sektor para kadagiti programa ken proyekto para ti pannakasaluad ti nakaparsuaan.

Adda dagiti umili nga agamak ken ni Cimatu a kas retirado nga opisial ti military ket indakdakkelna ti pannakatubay nga agtungpal nga umuna sakbay nga agreklamo a mabalin nga agparnuay iti epekto a negatibo kadagiti gannuat ti imatonanna a departamento. Ngem sino koma ngarud ti mangmandar kenkuana kas DENR Secretary, saan kadi a ti Presidente laengen ti nangatngato ngem isuna? No pagsayaatan la ketdi ti kaaduan ti imandar ti Chief Executive ket awan ti dakesna.

Dillawen pay dagiti dadduma nga umili a ti pannakadutok ti sigud a heneral iti gabinete ket mangipakita ti militarisasion iti agdama nga administrasion. Ngem adda kadi dakesna no nadutokan a kameng ti gabinete ti kualipikado a kas ken ni Cimatu? Saan kadi nga adda pay dagiti kameng ti agdama nga administrasion a nominado ken naggapu kadagiti makakannigid a grupo?

Maysa pay a pamilawan dagiti dadduma nga umili ken ni Cimatu ket ti sigud a panangakusar kenkuana ni sigud nga AFP Budget Officer, Lt. Colonel George Rabusa nga immawat ti dakkel a kuarta sakbay ti panagretirona kas Chief of Staff kabayatan idi ti Senate investigation iti Pabaon Controversy. Inakusaran idi ni Rabusa ni Cimatu a nakaawat iti agarup P110 million iti panagretirona. Iti panagtestimonia idi ni Cimatu iti Senate investigation, ket pinaglibakanna ti alegasion ni Rabusa. Napilaan idi isuna iti kaso a plunder iti Ombudsman ngem nawaswas daytoy idi 2012.

Gapu iti sigud nga alegasion ti pannakainaig ni Cimatu iti kurapsion, adda dagiti umili nga agsalsaludsod: Saan kadi a masansan nga ibagbaga ti Presidente nga uray arasaas laeng iti kurapsion dagiti kameng ti gabinetena ti mangegna ket umanayen a pangikkatanna kadakuada?

Dakkel a banag ti padas ni Cimatu nga opisial ti AFP para iti nasayaat a pannakamanehar ti DENR ta daytoy a departamento ket kasapulanna ti pannakaipakat dagiti nagadu a linteg a naputar tapno masaluadan ti nakaparsuaan. Kasapulan laeng a ti agakem iti daytoy a departamento ket addaan iti naan-anay a tured ken pinget a mangipakat kadagiti linteg, ket saan a padiktaran, pasulisog kadagiti pasuksok wenno rumukma kadagiti nabileg a tattao a manggundaway ken mangdaddadael iti nakaparsuaan. Awan ti tao wenno opisial nga adda amin kenkuana ti ayat ken kabaelan nga agserbi iti gobierno. Rumbeng laeng nga ikkan dagiti umili ti naan-anay a gundaway ni Cimatu a mangipaneknek ti kabaelanna nga agserbi iti DENR sakbay a mahusgaran isuna no maikari a mangidaulo iti dayta a departamento ti gobierno. (Eden Alviar)

Comments are closed.