Footer

SINURSURAN: Nabileg latta ti Awid dagiti Balikas

Kolum ni Jobert M. Pacnis

(Umuna a paset)

KOMBENSION ti GUMIL Filipinas (Gunglo Dagiti Mannurat nga Ilokano iti Filipinas)? Ania ti adda dita ta kasta la unayen ti ayat dagiti tumabtabuno?

Maika-49 a tawenen a maang-angay daytoy a panagdadap-ay dagiti Ilokano a mannurat. Nadumaduma a probinsia ti pakaiwarwardasanna. Iti kasta, mapadasan met ni Ilokano a mannurat a mapasiar dagiti ili a yan dagiti kadildilana. Ken saan laeng a bukbukodan ti maymaysa a lugar.

Naangay ti naudi a kombension dagiti mannurat nga Ilokano iti Union Christian College iti siudad ti San Fernando, La Union itay Abril 21–23. Sumurok-kumurang a dua gasut dagiti dimmar-ay.

Nagbalin pay a nakallalagip daytoy a tawen ta iti isu met laeng a petsa ken probinsia, sabali pay a grupo dagiti Ilokano a mannurat ti nagtataripnong— ti TMI wenno Timpuyog Dagiti Mannurat nga Ilokano. Dua a grupo ngem maymaysa ti nakaiturongan, nakaitalimudokan ti panggepda: ti mangtagiben iti Literatura Ilokana.

Saan la ket ngarud a naliklikan dagiti dadduma ti nangparnuay iti isyu (iti facebook) kadagiti dua a grupo. Ania kano ti ipasimudaag, ken mabasa, iti panagpada laengen ti petsa ken siudad a nakaangayan ti kombension?

Kasla kayatda a paruaren a nagtutulad ti maysa a grupo tapno kasla karitenna ti maysa no ania kadakuada ti ad-adu ti mannuratna a dumar-ay.

Agpada ti dua a grupo nga addaan iti rason. Saan a nairanta ti amin. Ti maysa, dati a kadagita a petsa ti lawas iti bulan ti Abril (nga indeklara ni nagpresidente Gloria Macapagal Arroyo a Bulan ti Literatura Ilokana) nga ang-angayenna ti kombension. Ti met sabali a grupo, Oktubre pay laeng iti napalabas a tawen, natinongdan a kadaytanto a petsa ken siudad ti pakaangayan met ti kombensionda a dati nga ang-angayenda iti bulan ti Mayo.

Naimbag ketdi ta saan a rimmaba ti patangan iti social media. Saan a nangparnuay iti giwang iti nagbaetan ti dua a gunglo. Pagsayaatanna ta addaan iti nawada a panagpampanunot dagiti liderda ket saanda nga indaddadaneng ti kasla paruaren dagiti nangparnuay iti isyu.

Iti kaundayen ti kombension dagiti mannurat nga Ilokano, saan latta a maikkat dayta gil-ayab kadagiti barukongda tapno ad-adda pay a rumungbo, dumur-as ti Literatura Ilokana.

Agpayso, no anagen a naimbag, kasla panagiinniliw laengen ti kombension. Agasem met ngamin ti panaggagayyem, panagsisinninged a nabukel iti nagbabaetan dagiti mannurat gapu laeng kadagiti sinuratda! Adda dayta di makita a linas a mangtitipkel kadakuada.

Saanen a ti seminar ti dar-ayan dagiti dadduma, aglalo kadagiti bangolan a makuna, no di ket ti pannakasirayda, pannakilangenda (uray iti apagbiit laeng) kadagiti padada a mannurat. No ania la ngamin ti adda a bileg dagiti balikas a nasangal ti plumada ta nangparnuay daytoy iti di magatadan a panaggagayyem.

Gapu itoy, adda latta rumsua a saosao kadagiti agdadamo a dumar-ay. Apay a di maipamaysa ti seminar? Apay nga awan ti atension dagiti dadduma iti seminar?

Ala, idi damok met ti dumar-ay kadaytoy a taripnong dagiti mannurat, dagita met a saludsod ti immuna nga immapay iti panunotko. Ngem sabagay, idi, awan met ti pokusko kadagiti maileklektiur, mapagpapatangan iti kombension. Lang-ay ti inobrak idi aglalo ket addaak pay laeng iti umuna a tukad ti kolehio. Sa nairana pay a naangay idiay Malasique, Pangasinan a resort ti naggiananmi ken naipasiarkami iti agdindinamag a Sangagasut nga Isla. Kayatko la idi a masirayan, maam-ammo dagiti mabasbasak ti naganda kadagiti panid ti Bannawag. Ket dita ti immuna a nakasirayak kadaydi Apo Samuel F. Corpuz nga awan palabsek nga isyu ti magasin mabasak laeng dagiti paset ti nobelana.

Ngem gapu ta adda idin essemko nga agsurat (ta nagsursuratak ti dandaniw kadagiti estasion ti radio ditoy Tanap), saan a daydi ti naudi nga itatabunok iti kombension. Immuneg nga immuneg ti essemko a makasurat koma met iti maipablaak iti magasin. Rineggetak pay ti nagsuratsurat ken dimmar-ay iti kombension. Aglalo la ngaruden idi rummuar iti Bannawag ti kaunaan a saritak idi 1997.

Sipud idin, no mabalbalin, diakon kayat a langanan ti kombension dagiti mannurat nga Ilokano. Akuek nga iti GUMIL (Gunglo Dagiti Mannurat nga Ilokano), nasapulak ti paratignay ti plumak tapno diak idisso daytoy a sirib nga insagut ti Namarsua. Iti GUMIL, naaddaanak iti baro a lubong a paggargarawan iti sidong dagiti naam-ammo, nagayyem ken nakasinsinnukat iti kapanunotan.

(Adda tuloyna)

Comments are closed.