Footer

SINURSURAN: Nabileg Latta ti Awis dagiti Balikas

Kolum ni Jobert M. Pacnis

(Maudi a paset)

Wen, agpayso nga iti kombension, madlawan la unay a dagiti laeng agdadamo ti nakapokus kadagiti seminar a maisaysayangkat. Ngem dakkel latta nga addang daytoy iti pannakabiag ti tarigagay ni Ilokano a mapadur-as ti panagsuratna.

Maysa a nakita a parikut iti kastoy a kombension, saan nga agpapada ti level dagiti delegado—agdadamo ken bangolan. Basic iti panagsuratan ti sapsapulen dagiti agdadamo idinto a panagiinniliw laengen kadagiti bangolan wenno lektiur a naidumduma kadagiti ammodan. Iti sumaganadto manen a tawen, adda ket addanto latta manen agdadamo a dumar-ay. No kasta a basic-to latta ti mailektiur, agbalin a boring kadagiti nakaaddangen. Ket maysa a nakita ti liderato ti GUMIL a solusion daytoy ti panamagsisina kadagiti delegado no kasta a lektiur. Adayo pay ti pagnaen daytoy nga addang ngem manamnama nga awan papananna no di agballigi.

No talaga a makaadal ti tarigagayan, adda daytoy inyusuat ti GUMIL a Pasnaan. Kaarngi daytoy daydi UP Creative Writing. Mapili dagiti fellows babaen kadagiti ipasada a piesa. Itinto Pasnaan, maadal dagiti pagkapsutan ken pagpigsaan dagiti sinurat. No narabaw ti kimmot ti fellow, mabalin a mamangit (a napasamaken kadagiti dadduma) inton ibinglayen dagiti panelists ti analisis/komentoda iti sinuratna—a mabalin a mangtungday iti arapaapna nga agbalin a mannurat. Kaskay’ la kalaingan, mabalin a makunana iti isipna kadagiti “nangparti” iti sinuratna.

Ngem segun iti ipakpakita ita ti resulta ti Pasnaan, addadan dagiti fellow nga agsasaruno ti maipabpablaakda. Sabali laeng dagiti mangab-abak kadagiti pasalip kangrunaan iti Palanca.

Iti kalkalpas a kombension, natratar manen no kasano ti agsurat iti literatura a para ubbing. Maik-ikkan ita ti pateg daytoy ta pagaammotayo nga adda programa ti Deprtamento ti Edukasion nga MTB-MLE a no sadino ket maisuro dagiti agad-adal iti Grado 1 – Grado 3 iti nakaiyanakanda a pagsasao.

Nakadidillaw ita, ken pagyamyamanan, ti kaadu dagiti mannursuro a dumardar-ay iti kombension. Maitugotan a kayatda met ti makasursuro tapno husto met laeng ti yad-adaldanto kadagiti ubbingda. Ta, ney, puera delos buenos, adu pay laeng dagiti mannursuro a saanda nga ammo ti basic iti Ortograpia Ilokana.

Adun ti naiwaras ken nailako a libro nga Ortograpia ngem saan latta nga umanay daytoy a mangsupusop iti panagkasapulan dagiti mannursuro. Koma, maipaganetget kadakuada (aglalo dagiti agisursuro kadagiti Grado 1 agingga iti Grado 3) ti panangipategda iti Literatura Ilokana. Saan laeng a PTB wenno para tungpal bilin nga ammuenda daytoy.

Maipalagip a nagbalin a proyekto ti GUMIL Cagayan ti panangseminarna kadagiti mannursuro wenno asino man a grupo nga agtarigagay a maadalan iti Ortograpia ti Ilokano ken no kasano ti agsurat. Addada dagiti napnapananda (a libre ti serbisioda) naglektiuran. Ngem bassit laeng daytoy no idilig iti no mano koma a mannursuro ti makasapul itoy.

Nagbalin ngamin a parikut dagiti opisial iti DepEd. Saanda a pinalubosan dagiti adda iti babaenda a mangannong iti seminar mainaig iti Literatura Ilokana. Adda pay idi daydi nalpasen a nabagaan amin a tumabuno a mannursuro iti maysa nga ili iti maangay a seminar ngem ti makadakes, saan a pinalugodan ida dagiti boss-da.

Itoy a pannakapili manen ti baro nga opisial (iti panangidadaulo ni Bokal Vilmer V. Viloria) a mangtimon iti organisasion (GUMIL Filipinas) iti uneg ti dua a tawen, manamnama a maitultuloy dagiti proyekto nga ad-adda pay a mangitag-ay itoy kangrunaan iti Literatura Ilokana. Ita pay laeng isagsaganan ti baro a presidente ti narungbonto a panag-Golden anniversary ti gunglo.

Ita, gayyem, kayatmo kadi ti agbalinto met a paset dayta nakallalagip a pagteng iti GUMIL? No wen ti sungbatmo, rugiam ngaruden a saganaan. Yurnongamon. Sadinonto man ti pakaangayanna, nakasaganan ti mabusbos. Malaksid iti rehistrasion, adunto a libro ti mayalnag a gapuanan dagiti pagtamdam a mannurat. Kasta met dagiti libro a rimmuaren ngem awan pay ti kopiam.

No addanto mangikari iti tulongna kadaytoy nanumo a nagsurat, ay, saan nga adayo a mangiruar met iti bukodna a libro. Suportaramto koma, ka-Sinursuran.

Agtultuloy, wen, ti panagtulid ti panawen. Nadumaduma nga isyu ti sanguen ti GUMIL kas met laeng kadagiti dadduma pay nga organisasion wenno gunglo. Ngem no agtultuloy latta ti panangayat ni Ilokano iti kinataona, iti lengguahena, ken pastrekenna ti bileg dagiti balikas iti isip ken pusona, saanto a marippuog daytoy. Tagibinenna latta ti Literatura Ilokana.#

 
No comments yet.

Leave a Reply