Footer

3 balay, nagsisina nasukisok; 3 paltog, nakumpiska

STA. CRUZ, Ilocos Sur – Kas paset ti imminget a kampania ti kapolisan kontra loose firearms, tallo manen a balay ti nagsisina a nasukisok ditoy nga ili, San Juan ken San Ildefonso a nagresulta iti pannakakumpiska dagiti otoridad iti tallo a paltog.

Nagpositibo iti paltog ti search operations nga inwayat ti kapolisan iti balay da Henry Andaquig Cabalbag, 30, mannalon, residente iti Barangay Villa Garcia, Sta. Cruz, Ilocos Sur; Santos Serdenia y Lopez, 62, karpintero, residente iti Barangay Bungro, San Ildefonso, Ilocos Sur; ken Reynold Guerrero y Gorospe, 60, diborsiado, residente iti Barangay Resurreccion, San Juan, Ilocos Sur.

Imet dagiti polis ti Search Warrant No. 2 nga inyisio ni Judge Gina Juan Chan ti Regional Trial Court, Branch 23, Candon City idi sinukisokda ti balay ni Andaquig idi agarup 5:00 ti Mayo 28 a nagresulta iti pannakakumpiskada iti cal. 38 a nagkarga iti maysa a bala ken kapsula.

Babaen met iti SW No. 20 nga inyisio ni Judge Marita Bernales Balloguing ti RTC Branch 20, Vigan City, idi agarup 5:05 ti malem ti Mayo 28, sinukisok ti sabali a grupo ti kapolisan a pakaibilangan ti PIB, Caoayan police station, ken San Ildefonso police station nga indauluan ni OIC Senior Inspector Frederico Apenier Artates iti balay ni Serdenia a nagresulta iti pannakakumpiskada iti homemade cal. 38 revolver a lima a bala ti nakakarga iti cylinder daytoy.

Kabayatanna, babaen ti bileg ti SW No. 25 nga inyisio ni Judge Raphiel F. Alzate ti RTC, Branch 24, Cabugao, inwayat ti kapolisan ti search operation iti balay ni Guerrero idi agarup 6:00 ti bigat ti Mayo 27 a nakakumpiskaanda iti maysa a cal. 45 Armscor nga adda nakaselsel a maysa a magazine; maysa a cal. 9mm Beretta nga adda kargana; 5 magazine para iti Cal. 9 mm; 25 a bala para iti Cal. 9mm; ken 2 nga air gun nga addaan scopes.

Nakalista ni Serdenia a drug surrenderee ti San Ildefonso.

Kas maibatay iti report, naannayas ti pannakaiwayat dagiti panagsukisok iti imatang dagiti barangay officials dagiti nadakamat a lugar.

Iti pannakaisurat daytoy, nakasuan ni Andaquig iti panaglabsing iti RA 10591 iti RTC Candon City babaen ti Criminal Case No. 3989-C ket nairekomenda nga agpiansa iti P200,000.00.

Nalpas metten ti inquest ti kaso a panaglabsing iti RA 10591 maikontra ken ni Guerrero iti Provincial Prosecutor’s Office, Vigan City idinto a maisagsaganan ti kaso maikontra ken ni Serdenia. (Tawid News)